აჭარაში, ქედი მუნიციპალიტეტში კაცი მოკლეს. შემთხვევა გუშინ, 2 ოქტომბრის საღამოს მოხდა. შინაგან საქმეთა სამინისტროს ინფორმაციით, დანაშაული ცხელ კვალზე გახსნეს და ბრალდებული დაკავებულია. უწყებაში ამბობენ, რომ ამოღებულია დანაშაულის იარაღი, დანა.

"გამოძიებით დადგინდა, რომ ბრალდებულმა ქედის მუნიციპალიტეტში, ურთიერთშელაპარაკებისას, 1987 წელს დაბადებულ მ.ბ.-ს ცივი იარაღის გამოყენებით სხეულზე ორი ჭრილობა მიაყენა. დაჭრილი მამაკაცი სამედიცინო დაწესებულებაში მიყვანიდან მალევე გარდაიცვალა. პოლიციამ დანაშაულის ჩადენის იარაღი — დანა ნივთმტკიცების სახით ამოიღო", — აცხადებენ შსს-ში.

უწყების ინფორმაციით, გამოძიება განზრახ მკვლელობის ფაქტზე, საქართველოს სისხლის სამართლის კოდექსის 108-ე მუხლით მიმდინარეობს, რაც 7-დან 15 წლამდე ვადით თავისუფლების აღკვეთას ითვალისწინებს.