ევროპული საქართველოს წევრი, ირაკლი აბესაძე, მთავრობის მიერ გამოცხადებულ ტენდერს ეხმიანება, რომლის მიხედვითაც მთავრობამ ტენდერი გამოაცხადა 325 ავტომობილის შეძენაზე. ავტომობილები განკუთვნილია შინაგან საქმეთა სამინისტროსთვის, გარემოს დაცვის სამინისტოსთვის და სხვადასვხა სახელმწიფო სააგენტოსთვის.

ირაკლი აბესაძის თქმით, თანხა, რომელიც უნდა მოხმარებოდა ადამიანების მნიშვნელოვანი პრობლემების მოგვარებას, ხმარდება ახალი მანქანების შეძენას, ოფისების მოწყობასა და პარტიული აქტივისტების სახელმწიფო სამსახურებში დასაქმებას.

"ასეულობით მილიონი ლარი, რომელიც უნდა ხმარდებოდეს მოსახლეობისთვის მნიშვნელოვანი პრობლემების მოგვარებას, ხმარდება ახალი მანქანების შეძენას, ახალი ოფისების მოწყობას, ახალი რბილი ავეჯის შეძენას, პრემიებს, დანამატებს, პარტიული აქტივისტების დასაქმებას სახელმწიფო ბიუჯეტის ხარჯზე და ეს არის ის, რაც უნდა შეიცავლოს მოახლოვებულ არჩევნებზე", — ამბობს აბესაძე.

აბესაძემ აღნიშნა, რომ ევროპული საქართველოს გეგმა, რომელიც ბიუროკრატიული ხარჯის 2 მლრდ. ლარით შემცირებას გულისხმობს, დაუსვამს წერტილს ფლანგველობას და მოსახლეობის პრობლემებისადმი უპასუხისმგებლობას.

"ევროპული საქართველოს გეგმით, 2 მილიარდ ლარამდე შეიძლება დაიზოგოს ბიუჯეტში სწორედ ასეთ, გაუმართლებელ ფინანსურ ხარჯებზე, ასევე სხვადასვხა ტიპის პროგრამებზე და სწორედ ამ რაოდენობის თანხა შეიძლება მოხმარდეს ეკონომიკის განვითარებას, გადასახადების შემცირებას, სამუშაო ადგილების შექმნას.

ასე რომ, ქართული ოცნების ფლანგველობას და უპასუხისმგებლობას მოსახლეობის პრობლემებისადმი, სწორედ წერტილი უნდა დავუსვათ არჩევნებზე", — განაცხადა ირაკლი აბესაძემ.