ქართული ოცნების თავმჯდომარე, ბიძინა ივანიშვილი ექსპრეზიდენტის, მიხეილ სააკაშვილის განცხადებებს "ცრუ სინანულსა და თეატრალური თვალთმაქცობის სამარცხვინო მაგალითებს" უწოდებს.

"გასული კვირების განმავლობაში, ჩვენ მოვისმინეთ ცრუ სინანულისა და თეატრალური თვალთმაქცობის სამარცხვინო მაგალითები", — განაცხადა ივანიშვილმა.

მისი თქმით, სააკაშვილის განცხადებები ადასტურებს იმას, რომ მას ქართულ საზოგადოებაზე დაბალი წარმოდგენა აქვს და ფიქრობს, რომ ხალხის ემოციებითა და გრძნობებით მანიპულირებას მარტივად მოახერხებს.

წინასაარჩევნოდ ექსპრეზიდენტმა, მიხეილ სააკაშვილმა ვიდეომიმართვა გაავრცელა, სადაც საქართველოს მოსახლეობას დაშვებული შეცდომების გამო ბოდიშს უხდის. ექსპრეზიდენტი ისევ ჰპირდება ამომრჩეველს დაბრუნებას, თუმცა წინა დაპირებებისგან განსხვავებით, არ აკონკრეტებს როდის.

ამ დრომდე სააკაშვილმა არაერთხელ განაცხადა, რომ საქართველოში დაბრუნდებოდა და "ივანიშვილის მმართველობას დაასრულებდა". ამას ჰპირდებოდა ის ამომრჩეველს, როგორც თვითმართველობის, ასევე, საპრეზიდენტო არჩევნების წინ.