ქართული ოცნების თავმჯდომარის, ბიძინა ივანიშვილის განცხადებით, 20 ივნისს ადგილი ჰქონდა ძალის გადამეტებას. ამის შესახებ მან პარტიის ეკონომიკური პროგრამის წარდგენისას განაცხადა.

ივანიშვილმა ხაზი გაუსვა იმასაც, რომ პარლამენტის თავმჯდომარის სკამში რუსი დეპუტატის, გავრილოვის ჩაჯდომა ხელისუფლების "უნებლიე შეცდომა" იყო. მისი თქმით, ამით ოპოზიციამ ისარგებლა და შტურმი სცადა.

"პერმანენტული მარცხით გაწბილებულებმა და ხელმოცარულებმა სხვა გზა რომ ვერ ნახეს, ბოროტად ისარგებლეს ხელისუფლების უნებლიე შეცდომის გამო აღელვებული ახალგაზრდობის გულწრფელი პროტესტით და მათ ხარჯზე სცადეს ძალაუფლების არალეგიტიმური გზით დაბრუნება — საქართველოს პარლამენტზე მიიტანეს ძალადობრივი შტურმი.

სახელმწიფომ გაუძლო ამ გამოწვევას და აღკვეთა ამბოხი, რასაც შედეგად, ჩვენდა სამწუხაროდ, ათეულობით დემონსტრანტის და სამართალდამცავის ჯანმრთელობის დაზიანება მოჰყვა. იყო, სამწუხარო გადაცდომებიც, ადგილი ჰქონდა ძალის გადამეტებასაც", — განაცხადა მან.

მისივე თქმით, სწორედ ამ ფონზე შემოიტანა ნაციონალურმა პროპაგანდამ, ჩაფლავებული ტერმინი "სისხლიანი რეჟიმი" მათ დასახასიათებლად.

"დამნაშავემ მსხვერპლის მანტია მოირგო, და დიქტატურასა და ტირანიაზე ურცხვად ალაპარაკდა. არც ამან იმუშავა. ხალხის მოტყუება კვლავაც ვერ შეძლეს", — განაცხადა მან.

გაიგეთ მეტი: