ახალი წლის დადგომამდე ერთი დღე დარჩა და თითქმის ყველა ოჯახში საახალწლო მზადება მიმდინარეობს. ახალი წლის სუფრა განსაკუთრებულია, მაგრამ ამაღლებული განწყობის შესაქმნელად მხოლოდ გემრიელი საჭმელი არ კმარა. აუცილებელია მომღიმარი ადამიანებიც, რომლებიც საახალწლო ფუსფუსის შედეგებს დააგემოვნებენ.

1. გოზინაყი

გოზინაყი საახალწლო სუფრის ერთ-ერთი მთავარი კომპონენტია. ბევრმა არ იცის, რომ გოზინაყს მხოლოდ ქართველები კი არა, სომხები, აზერბაიჯანელები და რუსებიც ამზადებენ. წესები მსგავსია, მაგრამ პატარა ცვლილებებიც კი მოქმედებს საბოლოო გემოზე.

• გოზინაყის მოსამზადებლად თქვენ აუცილებლად დაგჭირდებათ ნიგოზი, თაფლი და შაქარი. ნუ მოექცევით ჩარჩოებში, შეგიძლიათ ამ ნუგბარს ნებისმიერი ფორმა მისცეთ. იხილეთ მომზადების წესი და რეცეპტი.

2. საცივი

საცივი ქართველებისთვის ყველაზე საყვარელი საახალწლო კერძია და გოჭსაც კი უსწრებს პოპულარობით.

• არსებობს საცივის სხვადასხვა სახეობები. ზოგიერთი უფრო მძიმე და პომპეზურია, ზოგიერთი კი - მსუბუქი და სასიამოვნოდ დასაგემოვნებელი. მათ, ვისაც უფრო მძიმე და გადატვირთული საცივის მომზადება უყვართ, შეუძლიათ იხილონ ეს რეცეპტი, ხოლო ვინც უფრო მსუბუქ საცივს ანიჭებს უპირატესობას, მათ ამ რეცეპტის მიხედვით უნდა იხელმძღვანელონ.

3. ცომეული

ხაჭაპური/ლობიანი ახალი წლის სუფრის აუცილებელი კომპონენტი არაა, თუმცა ცომეულის დანახვა მაინც ყველა სტუმარს უხარია. ეს განსაკუთრებით ხაჭაპურს ეხება, რომელიც სუფრიდან თვალის დახამხამებაში ქრება ხოლმე.

• ხაჭაპურის მოსამზადებლად კარგი ყველი და ცომია საჭირო. იმისათვის, რომ ხაჭაპური გემრიელი გამოვიდეს, აუცილებელია ცომი სათანადოდ იყოს მომზადებული. ქართული სამზარეულო რამდენიმე ტიპის ხაჭაპურს აერთიანებს. ყველაზე პიპულარული ვერსიები იმერული და მეგრული ხაჭაპურებია.

4. შემწვარი გოჭი აჯიკით

ვის წარმოუდგენია ახალი წლის სუფრა გოჭის ხორცის გარეშე? მისი მომზადება საკმაოდ ხანგრძლივი და შრომატევადი პროცესია, თუმცა შედეგი წვალებად ღირს. იმისათვის, რომ გოჭის ხორცი კიდევ უფრო გემრიელი გამოვიდეს, შეგიძლიათ მას აჯიკა დაუმატოთ.

• სანამ გოჭის მომზადებას დაიწყებდეთ, აუცილებელია მთელი რიგი პროცედურების დაცვა. უნდა მოამზადოთ მარილწყალი, რომელსაც გოჭს შიგნიდან და გარედან წაუსვამთ. ასევე, შეწვის პროცესში მუდმივად უნდა აკონტროლოთ ტემპერატურა და გოჭს გადაუსვათ ზემოდან კარაქი ან შეზავებული სითხე. იხილეთ სრული რეცეპტი.

5. ბაჟე

საახალწლო სუფრაზე ნიგვზიანი საჭმელები მრავლად არის წარმოდგენილი. ბაჟე ერთ-ერთი მათგანია და არაჩვეულებრივ სოუსს წარმოადგენს შემწვარი ქათმისთვის ან თევზისთვის. ნიგოზი აუცილებლად თეთრი უნდა იყოს. დაგჭირდებათ ასევე ნიორი, უცხო სუნელი და ზაფრანა. მიჰყევით ამ რეცეპტს.

სასმელები

ახალი წლის სუფრაზე სასმელების მრავალფეროვანი არჩევანი აუცილებელია. ყველაფერი მისაღებია: ღვინო, კონიაკი, შამპანური, ვისკი. არაალკოჰოლური სასმელებიდან კი სუფრისთვის შეგიძლიათ ლიმონათები, ხილის წვენები და გაზიანი სასმელები მოიმარაგოთ.

ტკბილეული

ახალი წელი ტკბილეულის გარეშე წარმოუდგენელია. გადამალული კანფეტების ძიებით გატაცებული ბავშვები შოკოლადსა და კანფეტებს განსაკუთრებით ელიან. ხილი, ჩურჩხელა და ფელამუში საახალწლო სუფრას კიდევ უფრო განსაკუთრებულს გახდის.