საქართველოს ახალგაზრდა იურისტთა ასოციაცია ე.წ. კაბელების საქმეზე სასამართლოს მიერ გამოტანილ გამამტყუნებელ გადაწყვეტილებას უკანონოდ და დაუსაბუთებლად მიიჩნევს:

"სისხლის სამართლის კოლეგიის მოსამართლის ბესიკ ბუგიანიშვილის მიერ თავდაცვის სამინისტროს დაკავებული მაღალჩინოსნების, ე.წ. კაბელების საქმეზე გამოტანილ გამამტყუნებელი განაჩენი არის უსამართლო, უკანონო და დაუსაბუთებელი".

საია მიიჩნევს, საქმეზე დაკავებული პირები უდანაშაულოები არიან:

"ბრალდების დაუსაბუთებლობას ადასტურებს საქმის არსებითი განხილვის დროს ბრალდებულების და არაერთი მოწმისა და ექსპერტის მიერ მიცემული ჩვენება, ასევე წერილობითი მტკიცებულება".

საქართველოს ახალგაზრდა იურისტთა ასოციაცია მოსამართლის გადაწყვეტილების გასაჩივრებას აპირებს:

"როგორც ერთ-ერთი მსჯავრდებულის ინტერესების დამცველი, აღნიშნულ განაჩენს სამართლებრივი პროცედურების დაცვით ზემდგომ ინსტანციაში გავასაჩივრებთ".

ახალგაზრდა იურისტთა ასოციაცია აქცენტს აკეთებს საქმეში არსებულ იმ გარემოებაზე, რომ მსჯავრდებულებს დანაშაულის ჩადენის მოტივი არ გააჩნდათ:

"უმნიშვნელოვანესია იმის აღნიშვნა, რომ საქმეში არსებული მტკიცებულებებით არ დასტურდება დანაშაულის შემადგენელი უმნიშვნელოვანესი ელემენტის - მოტივის - არსებობა. კერძოდ, არსებული მტკიცებულებებით არ დადასტურდა ბრალდებულ პირთა მხრიდან ანგარებითი მიზნის არსებობა, რის გარეშეც არ არსებობს საქართველოს სისხლის სამართლის კოდექსით გათვალისწინებული 182-ე მუხლის მეორე ნაწილის ა, დ და მე-3 ნაწილის ბ ქვეპუნქტებით შემადგენლობა".

საიას თქმით, ბრალდების მხარის მიერ გაფლანგულად შერაცხული თანხა ბრალდებულების

საქმეში არსებული მტკიცებულებებით არ დასტურდება დანაშაულის შემადგენელი უმნიშვნელოვანესი ელემენტის - მოტივის - არსებობა

საია

მფლობელობაში არასდროს გადასულა, ასევე საფუძველი არ აქვს ბრალდებას სახელმწიფოს კუთვნილი ფულადი თანხის მართლსაწინააღმდეგოდ გასაფლანგად შექმნილი შეთანხმებული ჯგუფის არსებობის შესახებ, რომლის შემადგენლობაშიც ბრალდებულების გარდა და თავდაცვის სამინისტროს სხვა ხელმძღვანელი პირებიც იყვნენ.

საია მიიჩნევს, რომ ბრალდების მხარემ საერთოდ ვერ დაასაბუთა სამინისტროს თანამშრომელთა მხრიდან განზრხვაის არსებობა სახელმწიფო ბიუჯეტის თანხის ვინმეს სასიკეთოდ გასაფლანგად.

"ზემოაღნიშნული გარემოებების საწინააღმდეგოდ, ბრალდების მხარემ ვერ წარმოადგინა უტყუარი, ურთერთშეთანხმებული და გონივრულ ეჭვს მიღმა არსებულ მტკიცებულებათა ერთობლიობა, რაც საქართველოს კანონმდებლობით წარმოადგენს გამამტყუნებელი განაჩენის გამოტანისათვის აუცილებელ წინაპირობას.

ნიშანდობლივია ისიც, რომ მოსამართლეს განაჩენის გამოსატანად მხოლოდ ორი არასამუშაო დღე დასჭირდა საქმეზე, მაშინ როცა პროცესი 18 თვის განმავლობაში მიმდინარეობდა, დაიკითხა ათეულობით მოწმე, გამოკვლეულ იქნა ათეულობით წერილობითი მტკიცებულება, ამასთან აღნიშნული საქმე პრობლემური იყო სამართლებრივი თვალსაზრისითაც, რადგან ბრალდების ნაწილში არ იყო დასაბუთებული ბრალის სუბიექტი, სუბიექტური მხარე და მოტივი" - ვკითხულობთ საიას განცხადებაში.

საქართველოს ახალგაზრდა იურისტთა ასოციაცია, როგორც ერთ-ერთი მსჯავრდებულის ინტერესების დამცველი, აღნიშნულ განაჩენს სამართლებრივი პროცედურების დაცვით ზემდგომ ინსტანციაში გაასაჩივრებს.