კიტ ჰარინგტონის განცხადებით, მას ჯონ სნოუს მსგავსი როლების შესრულება აღარ სურს.

ინგლისელი მსახიობი გახმაურებულ სერიალში Game of Thrones ამ ერთ-ერთ მთავარ როლს რვა სეზონის განმავლობაში ასრულებდა. მიუხედავად იმისა, რომ მისი გმირი — ჯონ სნოუ ვესტეროსის მრავალფეროვან სახეებს შორის მილიონობით მაყურებლის ფავორიტი პერსონაჟი იყო, როგორც ჩანს, თავად სტარკების ოჯახის ამ წევრით დიდად კმაყოფილი სულაც არ ყოფილა.

"ვგრძნობ, რომ კაცებს ემოციების გამოხატვასთან დაკავშირებით პრობლემა აქვთ, ერთგვარი ბლოკადა, რომელიც მეორე მსოფლიო ომიდან მოდის და ბაბუიდან მამას, მამიდან კი ვაჟს გადაეცა", — მასკულინობასთან დაკავშირებულ წნეხზე ისაუბრა მსახიობმა The Telegraph-თან ინტერვიუში.

ჰარინგტონმა თავისი პერსონაჟის მაგალითზე მასკულინობასთან ერთად ზოგადად კინოსა თუ ტელევიზიაში კაცების რეპრეზენტაციაზე ისაუბრა:

"ჩვენ არ ვსაუბრობთ იმაზე, თუ რას ვგრძნობთ, რადგან ეს სისუსტედ ითვლება, იმად, რაც მასკულინობის ნაწილი არ არის. აღარ მინდა იმ კაცის განსახიერება, რომელიც ჩუმი გმირია. ეს არ არის მასკულინობის ის სახე, რომლის კიდევ ნახვაც სამყაროს სჭირდება".

ფოტო: Matthew Brookes

ჯერ კიდევ 2018 წელს კიტ ჰარინგტონმა გამორიცხა იმის ალბათობა, რომ Game of Thrones-ის სპინოფ სერიალში ოდესმე კვლავ ითამაშოს ჯონ სნოუს როლი:

"ვისურვებდი თუ არა კვლავ ამ როლის შესრულებას? არასდროს. თუ საპილოტე სერიიდან ავითვლი, ამ როლს ჩემი ცხოვრების ათი წელი შევწირე. ეს ნამდვილად უჩვეულო გამოცდილებაა მსახიობის კარიერაში. ამავდროულად კი ძალიან დიდი ემოციური დანაკარგი იყო ამ ოჯახთან დამშვიდობება".

HBO-ს ამ საკულტო შოუმ აქცია ეს ახალგაზრდა მსახიობი ჰოლივუდის ნამდვილ ვარსკვლავად, თუმცა ჯერჯერობით ამ შოუს გარდა სხვა ბევრ ცნობილ პროექტში მონაწილეობა არ მიუღია: 2018 წელს გამოჩნდა ქსავიე დოლანის კინოსურათში The Death & Life of John F. Donovan, 2021 წელს კი დაგეგმილია მარველის ახალი დამაინტრიგებელი პროექტის — The Eternals პრემიერა, რომელშიც სწორედ ჰარინგტონს ახალ ამპლუაში ვიხილავთ.