სახელმწიფო უსაფრთხოების სამსახურის საინფორმაციო-ანალიტიკური დეპარტამენტის დირექტორის მოადგილის, ირაკლი ანთაძის განცხადებით, დღეს ოკუპირებული ცხინვალის ციხიდან გათავისუფლებული ხვიჩა მღებრიშვილის შეფასებით მისი ჯანმრთელობის მდგომარეობა დამაკმაყოფილებელია. ანთაძის თქმით, მღებრიშვილს ვიზუალურად ძალადობის ნიშნები არ აღენიშნება.

"გარემოებებიდან გამომდინარე ის საკარანტინო სივრცეში გადაყვანას ექვემდებარება. საკარანტინე პერიოდის დასრულების შემდეგ კი ჩვენ მასთან დეტალური გასაუბრების შესაძლებლობა გვექნება. შესაბამისად, გვექნება მეტი ინფორმაცია და მეტი დეტალი და სხვა დაკავებულების უკანონო პატიმრობაში ყოფნასთან დაკავშირებით", — განაცხადა ანთაძემ მღებრიშვილის ქართული მხარისთვის გადაცემის შემდეგ ჟურნალისტებთან საუბრისას.

86 დღიანი პატიმრობის შემდეგ, სოფელ მეჯვრისხევის მცხოვრები, ხვიჩა მღებრიშვილი დღეს, 25 სექტემბერს გათავისუფლეს.

სახელმწიფო უსაფრთხოების სამსახურის საინფორმაციო-ანალიტიკური დეპარტამენტის დირექტორის მოადგილემ, ირაკლი ანთაძემ გუშინ, 24 სექტემბერს ინციდენტების პრევენციისა და მათზე რეაგირების მექანიზმის (IPRM) რიგით 97-ე შეხვედრის დასრულების შემდეგ განაცხადა, რომ მღებრიშვილის გათავისუფლებას დღეს ელოდებოდნენ.

მღებრიშვილი ოკუპირებული ცხინვალის დე ფაქტო პროკურატურის მიერ ე.წ. საზღვრის უკანონო კვეთასა და ცხინვალის რეგიონიდან ღამურების გატანის მცდელობის ბრალდებით იყო დაკავებული. ანთაძის თქმით, სხვა უკანონოდ დაკავებულების გასათავისუფლებლად მუშაობა გრძელდება.