იუსტიციის უმაღლესი საბჭოს არამოსამართლე წევრის, ნაზი ჯანეზაშვილის განცხადებით, სასამართლო ხელისუფლებას ქვეყნის მასშტაბით მოსამართლეების საჭირო რაოდენობა არ ჰყავს, რაც სასამართლო პროცესების გაჭიანურების მთავარი მიზეზია. მისი თქმით, მოსამართლეების, ასევე, შესაბამისი მოხელეების დასამატებლად ბიუჯეტში შესაბამისი ფინანსები გათვალისწინებულია, თუმცა "გავლენიანი კლანი" ხელოვნურად ინარჩუნებს მოსამართლეთა დეფიციტს.

ნაზი ჯანეზაშვილის განცხადებით, საქართველოს რაიონულ სააპელაციო სასამართლოებში 109 ადგილი ვაკანტურია, ანუ 387-ს ნაცვლად 278 მოსამართლეა.

იუსტიციის უმაღლესი საბჭოს არამოსამართლე წევრის თქმით, მოსამართლეთა სიმცირის თვალსაზრისით გამორჩეულად დატვირთულ თბილისის საქალაქო სასამართლოში, სადაც მოსამართლის 24 ვაკანსიაა, არასახარბიელო ვითარებაა, ბათუმის საქალაქო სასამართლოს კი 16-ის ნაცვლად 10 მოქმედი მოსამართლე ჰყავს.

მისივე თქმით, გორის რაიონული სასამართლოს სამოქალაქო საქმეთა კოლეგიას, მცხეთის რაიონული სასამართლოს სამოქალაქო საქმეთა კოლეგიას და ქუთაისის საქალაქო სასამართლოს ადმინისტრაციულ საქმეთა კოლეგიას მოსამართლე არ ჰყავს. ასევე, სასამართლოებს მაგისტრატი მოსამართლეები 26 მუნიციპალიტეტში არ ჰყავს.

ნაზი ჯანეზაშვილის თქმით, ამ პრობლემის აღმოფხვრა მხოლოდ კონკურსის მეშვეობით არის შესაძლებელი.

On.ge ცდილობს დაუკავშირდეს იუსტიციის უმაღლესი საბჭოს. აღნიშნულთან დაკავშირებით მათ პოზიციას მიღებისთანავე შეგატყობინებთ.