მთავარი პროკურორი ირაკლი შოთაძე კონსტიტუციური უსაფრთხოების დეპარტამენტის აფხაზეთის მთავარი სამმართველოს ყოფილი უფროსის განაჩენს გამოეხმაურა და განაცხადა, რომ პროკურატურა მას გაასაჩივრებს:

"მიუხედავად გატარებული შესაბამისი ღონისძიებებისა, სამწუხაროდ ვერ განხორციელდა გვამების პოვნა. შესაბამისად, ჩვენთვის გასაგებია სასამართლოს დასაბუთება და ჩვენ მიგვაჩნია, რომ ეს უნდა დაკვალიფიცირდეს დასრულებული მკვლელობით და ვაპირებთ აღნიშნული განაჩენი გავასაჩივროთ სააპელაციო სასამართლოში".

საქმე ეხება რომან შამათავას, რომელიც თბილისის საქალაქო სასამართლომ 22 დეკემბერს დამნაშავედ სცნო ორი პირის მკვლელობის მცდელობასა და თავისუფლების უკანონოდ აღკვეთაში და 8 წლით თავისუფლების აღკვეთა მიუსაჯა.

თბილისის საქალაქო სასამართლოს გადაწყვეტილებით რომან შამათავას განზრახ მკვლელობის ბრალდება, განზრახ მკვლელობის მცდელობით გადაუკვალიფიცირდა. იგი გამართლდა ორგანიზებული ჯგუფის მიერ ჩადენილ თავისუფლების უკანონო აღკვეთის ნაწილში და მისი ქმედება დაკვალიფიცირდა როგორც მკვლელობის გაადვილების მიზნით ჩადენილი თავისუფლების უკანონო აღკვეთა.