ჯანდაცვის მინისტრის მოადგილის, თამარ გაბუნიას განცხადებით, კორონავირუსზე ტესტირების პასუხები გვიანდება იმიტომ, რომ რაოდენობრივად უფრო მეტი ტესტი ტარდება და მისი დაყოვნების ხანგრძლივობა სამ დღემდე გაიზარდა. ამის შესახებ მან საკოორდინაციო საბჭოს ბრიფინგის დასრულების შემდეგ ისაუბრა.

თამარ გაბუნიას თქმით, კორონავირუსზე ტესტირებების პასუხი 7-8 დღით არ დაგვიანებულა.

"გარკვეული დაგვიანება იყო იქიდან გამომდინარე, რომ დიდი რაოდენობით ტესტირებები ტარდება რის, გამოც დაყოვნების პერიოდი გაიზარდა დაახლოებით სამ დღემდე. ზოგიერთ შემთხვევაში საჭირო ხდება პასუხების გადამოწმება და შესაძლოა ამას დამატებითი დრო დასჭირდეს. ამ მხრივ საველე ტესტირების პასუხები ამ ეტაპისთვის სრულად ამოწურულია და ჩვენ ვფიქრობთ, უახლოეს დღეებში დავუბრუნდებით ისევ 24 საათიანი ტესტირებებზე", — განაცხადა გაბუნიამ.

დღეს საქართველოში კორონავირუსის 218 ახალი შემთხვევა გამოვლინდა. ქვეყანაში სულ კორონავირუსის 3 913 შემთხვევაა გამოვლენილი, საიდანაც 1 574 უკვე გამოჯანმრთელდა, 22 კი გარდაიცვალა.