ევროპული საქართველოს მაჟორიტარი დეპუტატობის კანდიდატი აჭარის უმაღლეს საბჭოში, ვახტანგ კალოიანი, ხელისუფლებას იმ კონკრეტულ ნაბიჯებს სთავაზობს, რომლებიც უზრუნველყოფს მოქალაქეების უსაფრთხოებას პანდემიის დროს.

ვახტანგ კალოიანის თქმით, უნდა შეიქმნას გაწერილი გეგმა, სამედიცინო პერსონალის უზრუნველყოფა უნდა მოხდეს ინდივიდუალური დაცვის საშუალებით, ასევე უნდა მოხდეს რისკ ჯგუფების გაძლიერებული კონტროლი, პირველადი ჯანდაცვის ჯაჭვის გამართვა, რითაც მოხდება ვირუსის გავრცელების მაქსიმალური პრევენცია.

"მიუხედავად ხელისუფლების მიერ დაკარგული დროისა და უაზროდ გაფლანგული რესურსისა, დღეს არ შევჩერდებით მის კრიტიკაზე. შემოგთავაზებთ კონკრეტულ ნაბიჯებს, რომელიც უზრუნველყოფს ჩვენი მოქალაქეების უსაფრთხოებას", — განაცხადა კალოიანმა.

მის მიერ შეთავაზებული ნაბიჯები ასე გამოიყურება:

  1. კლინიკების მობილიზაციის გაწერილი გეგმა — საწოლთა რაოდენობის, აღჭურვილობის, ინდივიდუალური დაცვის საშუალებების, ექიმებისა და ექთნების რაოდენობის მითითებით, მათი პროცესში ჩართვის დროში დეტალურად გაწერილი გეგმის შექმნა;
  2. სამედიცინო პერსონალის უზრუნველყოფა ინდივიდუალური დაცვის საშუალებებით. სახელფასო დავალიანებების სრული დაფარვა;
  3. რისკ-ჯგუფების — მოხუცთა თავშესაფარების, დიალიზის, ონკოლოგიის სამსახურების უზრუნველყოფა შესაბამისი თავდაცვის საშუალებებით და მათი უსაფრთხოების გაძლიერებული კონტროლი;
  4. ჯანდაცვის ნაციონალური ცენტრისთვის კვლევების დღიურად 10 ათასი ტესტის შესრულების საშუალების მიცემა;
  5. კერძო თუ სახელმწიფო ლაბორატორიების შიდა თუ გარე ხარისხის კონტროლის შედეგების პერიოდული ხელმისაწვდომობა;
  6. 112-პაციენტი-პირველადი ჯანდაცვა ჯაჭვის გამართვა — ტექნიკური აღჭურვილობის გადაცემა, კონკრეტული სამოქმედო გეგმის მიცემა;
  7. პანდემიის მომზადებისთვის დახარჯული სახსრების და მიმდინარე ხარჯების საჯაროობა;
  8. გრიპის ვაქცინაციისთვის საჭირო ღონისძიებების დროული განხორციელება. მათი საჯაროობა და დროში გაწერილი მოქმედებები.

"მიუხედავად ხელისუფლების მიერ შესრულებული სამუშაოს ძალიან დაბალი შეფასებისა, რისთვისაც ისინი აგებენ პოლიტიკურ პასუხს, ევროპული საქართველო მზად არის ნებისმიერი ფორმით — ინტელექტუალურად თუ ფიზიკურად — დაეხმაროს ჯანდაცვის სამინისტროს მის წინაშე მდგარი პრობლემების გადაწყვეტაში", — განაცხადა ვახტანგ კალოიანმა.