დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ეკონომიკის მინისტრის, ნათია თურნავას განცხადებით, კორონავირუსის მეორე ტალღა საქართველოში უკვე დაწყებულია. ამის შესახებ მან მთავრობის სხდომის დასრულების შემდეგ ისაუბრა.

"სამწუხაროდ, ის მეორე ტალღა, რომელსაც ვარაუდობდნენ მთელი მსოფლიოს ეპიდემიოლოგები, საქართველოში უკვე დაწყებულია. ამას რამდენიმე მიზეზი გააჩნია", — განაცხადა თურნავამ.

მისივე თქმით, მთავრობა ყველაფერს აკეთებს, რათა ეპიდემიოლოგიური მდგომარეობა კონტროლს დაექვემდებაროს.

"ჩვენ ვერ შევპირდებით მოსახლეობას, რომ კორონავირუსი სადმე გაქრება, ეს შეუძლებელია, მაგრამ ჩვენ რასაც შევპირდით, რომ ჩვენ ერთად ვისწავლით ცხოვრებას მიუხედავად პანდემიიისა და ეპიდემიისა", — აღნიშნა მან.

ქვეყნის მასშტაბით, 10 სექტემბრის მონაცემებით, კორონავირუსის 57 ახალი შემთხვევა გამოვლინდა, გამოჯანმრთელდა 9 პაციენტი.

ჯამში, საქართველოში კორონავირუსის დადასტურებულ შემთხვევათა რაოდენობა 1 830-მდე გაიზარდა, ამათგან 1 334 უკვე გამოჯანმრთელდა, 19 კი გარდაიცვალა. კარანტინის რეჟიმში იმყოფება 5 882, სტაციონარში მეთვალყურეობის ქვეშ კი — 390.