ლელოს გლდანის მაჟორიტარი დეპუტატობის კანდიდატის, გიგლა მიქაუტაძის განცხადებით, მთავრობის მიერ თელასში 25%-იანი წილის მიზერულ თანხად გაყიდვით, საქართველოს მთავრობამ და მმართველმა პოლიტიკურმა ძალამ ქართველი ხალხის ქონება კიდევ ერთხელ გაანიავა.

გლდანის მაჟორიტარი დეპუტატობის კანდიდატის თქმით, აღნიშნულ საკითხზე ერთი წლის წინ გავრცელებული ინფორმაცია, რომელსაც მთავრობა უარყოფდა, დადასტურდა და დღეს სახელმწიფო აქტივი კონკურენციის გარეშე გასხვისდა.

"ერთი წლის წინ გავრცელდა ხმები იმასთან დაკავშირებით, რომ ის ბიზნესჯგუფი, რომელმაც დღეს შეიძინა ეს წილი, აპირებდა თელასის ყიდვას, თუმცა მაშინ მთავრობა უარყოფდა ამ ფაქტს. ამიტომ ვსვამ კითხვას, რა შეიცვალა მას შემდეგ, რატომ აღმოჩნდა ასე სასწრაფოდ აუცილებელი შუა კორონა ეპიდემიის დროს, როდესაც ზოგადად შემცირებულია ინტერესი ინვესტორების მხრიდან, სასწრაფოდ, ერთ თვეში გაყიდულიყო ეს აქტივი", — განაცხადა მიქაუტაძემ.

მისივე თქმით, ამასთან, დაბალი იყო საწყისი ფასი, დაახლოებით, 10 მილიონ დოლარი, მაშინ, როდესაც თელასის 75% 1998 წელს 25 მილიონ დოლარად გაიყიდა.

"მას შემდეგ კომპანიაში განხორციელდა, დაახლოებით, ნახევარი მილიარდი დოლარის ინვესტიცია. დღეს ამ პირობებში სახელმწიფო ამბობს, რომ ის 25%-იანი წილი, რომელიც დარჩა ქვეყანას, მხოლოდ 10 მილიონი დოლარი ღირს. ეს ცალსახად არის კორუფციული და საეჭვო და ჩვენ ამას რეაგირების გარეშე არ დავტოვებთ", — აღნიშნა მან.

გიგლა მიქაუტაძე მთავრობას რამდენიმე კითხვით მიმართავს. კონკრეტულად კი, გახარიასგან ელოდება პასუხს, რატომ გახდა აუცილებელი სასწრაფოდ თელასში სახელმიწფო წილის გაყიდვა და რატომ ასეთ დაბალ ფასად. ის მოითხოვს, გასაჯაროვდეს აუდიტორული დასკვნა და ყველა იმ კომპანიის სია, რომელიც სახელმწიფომ აუქციონში მოიწვია, თუ ასეთი არსებობს ბუნებაში.

მიქაუტაძემ ენერგეტიკის მარეგულირებელ კომისიასა და სახელმწიფო აუდიტის სამსახურსაც მიმართა, რათა მიმდინარე პროცესი შეაჩერონ, შეიწავლონ კარგად და დასვან იგივე კითხვები, რასაც სვამს ლელო და სანამ არ მიიღებენ პასუხებს, ტრანზაქცია შესრულებულად არ ჩათვალონ.

"მინდა გითხრათ, რომ ლელოს "მარშალის გეგმის" მიხედვით სახელმწიფო კომპანიები განკერძოვდება გამჭვირვალე გზით. ჩვენ დავამკვიდრებთ ახალ სტანდარტს, როდესაც სახელმწიფო ქონება გასხვისდება მხოლოდ საფონდო ბირჟის საშუალებით, რაც ნიშნავს იმას, რომ საქართველოს ნებისმიერ მოქალაქეს ექნება შესაძლებლობა, მცირე წილი მაინც შეიძინოს სახელმწიფო ქონებიდან", — აღნიშნავს მიქაუტაძე

მისივე განცხადებით, ამით სახელმწიფო ქონების მიტაცება-განიავების მანკიერი ტრადიცია საქართველოში დასრულდება.