ევროპული საქართველოს საარჩევნო შტაბის ხელმძღვანელი, სერგი კაპანაძე, გახმაურებული საქმეების არასათანადოდ გამოძიებაზე აკეთებს კომენტარს.

სერგი კაპანაძის თქმით, ნდობა სამართალდამცავი სისტემის მიმართ არ არსებობს და ამის მთავარი მიზეზი მის სტრუქტურაში არსებული ხარვეზებია. სერგი კაპანაძის თქმით, სამართალდამცავ სტრუქტურებს აკონტროლებს ერთი ადამიანი, მცირე ჯგუფი ან კლანი.

კაპანაძემ აღნიშნა, რომ ეს სისტემა უნდა შეიცვალოს, რასაც გარდამტეხი ცვლილებები სჭირდება, ევროპული საქართველო კი ვალდებულებას იღებს ამ კონკრეტული რეფორმების შესრულებაზე.

"სისტემის მთავარი პრობლემა არის ის, რომ ყველა სამართალდამცავი სტრუქტურა, სასამართლო, პროკურატურა, შინაგან საქმეთა სამინისტრო ექვემდებარება ერთ ადამიანს და ასრულებს ერთი ადამიანის, მცირე ჯგუფის ან კლანის მითითებებს. აქედან გამომდინარე უნდობლობა არის მზარდი. ეს არის ფუნდამენტური რამ, რაც უნდა შეიცვალოს და როცა ვამბობთ, რომ გვინდა ცვლილებები, გვინდა რომ გარდატეხა მოხდეს ამ ქვეყანაში და ქვეყანა წინ წავიდეს და ამის მნიშვნელოვანი ნაწილია, რომ გაიზარდოს ნდობა სამართალდამცავი სტრუქტურების მიმართ და ამას სჭირდება კონკრეტული რეფორმები, სრული დეპოლიტიზაცია პოლიციის, დამოუკიდებელი საგამოძიებო მექანიზმის ქონა და ის ყველაფერი, რისი შესრულების ვალდებულებაც აიღო ევროპულმა საქართველომ არჩევნებში ბიძინა ივანიშვილის დამარცხების შემდეგ", — აცხადებს სერგი კაპანაძე.