ღიად პრორუსული პარტიის, პატრიოტთა ალიანსის ლიდერმა, ირმა ინაშვილმა რუსთავი 2-ის ეთერში "ღვთისა და ერის წინაშე" დაიფიცა, რომ მას და დავით თარხან-მოურავს რუსული ფული არასდროს აუღიათ.

"ახლა თქვენს ეთერში საჯაროდ ვამბობ — მე, ირმა ინაშვილი, საქართველოს პარლამენტი წევრი, საქართველოს მოქალაქე, ღვთისა და ერის წინაშე და ტელემაყურებლის წინაშე ვფიცავ, რომ მე არასდროს არ ამიღია რუსული ფული, არც დავით თარხან-მოურავს არ აუღია რუსული ფული. მე, ირმა ინაშვილი, ღვთისა და ერის წინაშე ვფიცავ, რომ ყოველი ჩემი მოქმედება გამსჭვალულია საქართველოს სიყვარულით, მისდამი თავგანწირვით", — განაცხადა ინაშვილმა.

მისივე თქმით, ათი დღის განმავლობაში ის და მისი პარტიის ლიდერები საინფორმაციო შტურმის ქვეშ არიან და დაიღალა იმის მტკიცებით, რომ ქვეყნისა და ხალხის წინაშე დანაშაული არ ჩაუდენია.

24 აგვისტოს ცენტრ დოსიეს განკარგულებაში აღმოჩნდა სამუშაო დოკუმენტები, ანალიტიკური ანგარიშები, ფინანსური შეფასებები, წინასაარჩევნო მეთოდები და საოპერაციო მოხსენებები დაზვერვის გენერალ ჩერნოვის სამდივნოდან. მათი განცხადებით, ამ დოკუმენტებით ირკვევა, რომ რუსეთი საქართველოს არჩევნებში ჩარევასა და შედეგებზე გავლენის მოხდენას ცდილობს და სასურველი შედეგის მისაღწევად პატრიოტთა ალიანსს აფინანსებს, რომელიც ანტიდასავლური და პრორუსული რიტორიკით გამოირჩევა.