სახალხო დამცველის ნინო ლომჯარიას განცხადებით, თბილისი პრაიდის მიმართ რადიკალურად განწყობილი ჯგუფების მხრიდან ძალადობრივი ინციდენტები ამ დრომდე გრძელდება და სამართალდამცავი უწყება ვერ ახერხებს ძალადობის პრევენციას. მისივე თქმით, აღნიშნული ვითარება ხელს უშლის ორგანიზაციის საქმიანობას.

ომბუდსმენი და მისი მოადგილე, ეკატერინე სხილაძე პირველ სექტემბერს თბილისი პრაიდის წარმომადგენლებს შეხვდნენ და ორგანიზაციის საქმიანობას და არსებულ გამოწვევებს გაეცნენ.

მიმდინარე წლის მაისის შემდეგ ორგანიზაციის ოფისს არაერთხელ დაუშინეს კვერცხები და საღებავები. ოფისის შესასვლელთან პერიოდულად იმართება შეკრებები, რომელზეც ისმის სიძულვილის ენა, პრაიდის აქტივისტების მიმართ ხშირია სიტყვიერი შეურაცხყოფა და მუქარა.

ფოტო: სახალხო დამცველი

ფოტო: სახალხო დამცველი

როგორც ომბუდსმენის განცხადებაშია აღნიშნული, განგრძობით ძალადობას უარყოფითი გავლენა აქვს, როგორც თბილისი პრაიდის თანამშრომლებზე, აქტივისტებსა და უფლებადამცველებზე, ისე, ზოგადად, ლგბტ+ თემის წევრებზე, ქვიარ ადამიანებსა და მათ უფლებრივ მდგომარეობაზე. თბილისი პრაიდის წარმომადგენლები აცხადებენ, რომ ეს სტრესის ქვეშ ამყოფებს ორგანიზაციის თანამშრომლებს, ხელს უშლის მათ მუშაობაში, აღრმავებს ქვიარ ადამიანების მიმართ არსებულ ზიზღს, სტიგმას და ახალისებს ლგბტ+ თემის მიმართ ძალადობას.

"ბოლო დროს, ლგბტ+ უფლებადამცველების მიმართ განხორციელებული შევიწროების და მუქარის ფაქტები ერთგვარი ილუსტრაციაა იმისა, რომ უფლებების შეზღუდვისას, კერძო პირებთან მიმართებაში, უმეტეს შემთხვევაში, სახელმწიფო ეფექტურ რეაგირებას ვერ ახდენს. შედეგად, ქვეყანაში კვლავ მაღალია გენდერული იდენტობისა და სექსუალური ორიენტაციის ნიშნით ლგბტ+ პირების მიმართ ძალადობის ფაქტები", — აღნიშნულია განცხადებაში.

ამიტომ, სახალხო დამცველს მნიშვნელოვნად მიაჩნია, სამართალდამცავი უწყებების მიერ მსგავსი შემთხვევების პრევენცია, უფლებადამცველების მიმართ მუქარის და ძალადობის ფაქტების და მათგან მომდინარე რისკების სწორად შეფასება და ეფექტური რეაგირება.