"3 უკბილო ლექსი გამოაქვეყნა, მთელი წელიწადნახევრის განმავლობაში" — ასე აფასებს მთაწმინდაზე ქართული ოცნების მაჟორიტარ დეპუტატს, ლადო კახაძეს პარტია მოქალაქის ლიდერი ალეკო ელისაშვილი. პალიტრა ნიუსის ეთერში ის კითხვით მიმართავს მთაწმინდელებს, თუ გამოადგათ კახაძე რამეში.

"დეპუტატი ვარდის კოკორივით კი არ უნდა იჯდეს და ხმას არ იღებდეს საერთოდ, როგორი მაჟორიტარებიც გვყავს ძირითადად, არამედ... აი, ახლა მთაწმინდელებს მინდა ვკითხო: შარშან რომ აირჩიეთ ლადო კახაძე, გამოგადგათ რამეში? რამე ხეირი მაგ კაცისგან არის? 3 ლექსი გამოაქვეყნა, უკბილო, მთელი ერთი წლის, წელიწადნახევრის განმავლობაში. რამე სარგებელი მიიღეთ? ვისა გაგიჭირდათ მთაწმინდაზე მიხვედით და დაგეხმარათ?" — განაცხადა ელისაშვილმა.

ელიკო ელისაშვილი საბურთალოს რაიონის მაჟორიტარობის კანდიდატია. ის აცხადებს, რომ მის ძირითად კონკურენტად ქართული ოცნების კანდიდატს, დავით სერგეენკოს განიხილავს. ამავე ოლქში იყრიან კენჭს ირაკლი ოქრუაშვილი და ლევან გოგიჩაიშვილი.