ცესკო არჩევნების ორგანიზებისთვის აუცილებელი ღონისძიებების განხორციელებას დღეიდან ოფიციალურად იწყებს. ცესკოს პრესსპიკერის, ანა მიქელაძის განცხადებით, პირველი სექტემბრიდან წინასაარჩევნო კამპანიის ჩატარების (აგიტაციის) წარმოების ყველა წესი გამოქვეყნდა.

"ამ მომენტისათვის არჩევნებში მონაწილეობის მიღების მიზნით რეგისტრაცია 59 პოლიტიკურმა პარტიამ გაიარა. დანარჩენ, გარკვეულ პარტიებს არჩევნებში მონაწილეობის მიზნით ცესკოს თავმჯდომარისთვის მიმართვა 4 სექტემბრამდე შეუძლიათ. 4 სექტემბრამდე შეუძლიათ, აგრეთვე, რეგისტრაცია საინიციატივო ჯგუფის წარმომადგენლებს", — განაცხადა ანა მიქელაძემ ბრიფინგზე.

მისივე თქმით, დღეს გამართულ ცენტრალური საარჩევნო კომისიის სხდომაზე საპარლამენტო არჩევნების ღონისძიებათა გრაფიკთან ერთად, საჭირო სანიტარულ-ჰიგიენური ნორმები დადგინდა. ცესკომ საქართველოს პარლამენტის არჩევნების ორგანიზება 3 657 საარჩევნო უბანზე უნდა უზრუნველყოს.

საქართველოს პრეზიდენტმა პარლამენტისა და აჭარის ავტონომიური რესპუბლიკის უმაღლესი საბჭოს არჩევნების თარიღად 31 ოქტომბერი დაასახელა. შესაბამისი განკარგულება მან უკვე გამოსცა.

ოქტომბრის წლევანდელი არჩევნები პირველი შემთხვევა იქნება, როცა არჩევნები 120/30 სისტემით ჩატარდება.