ევროპული საქართველო გამოდის ინიციატივით, რომ მიმართოს საკონსტიტუციო სასამართლოს, რათა პატრიოტთა ალიანსი საპარლამენტო არჩევნებიდან მოიხსნას. ამის შესახებ პარლამენტში პლენარულ სხდომაზე პარტიის წევრმა, ირმა ნადირაშვილმა ისაუბრა.

ნადირაშვილის თქმით, საკითხის განსახილველად 30 პარლამენტის წევრის თანხმობაა საჭირო და 20 ოპოზიციონერი დეპუტატის ხელმოწერა უკვე არსებობს. მან მმართველი გუნდის წევრებს მიმართა, რომ დაამატონ დანარჩენი ხელმომწერები.

"თუ ეს გუნდი თქვენი გაგრძელება არაა, მივმართოთ საკონსტიტუციო სასამართლოს და მოხსნას ეს პოლიტიკური ჯგუფი არჩევნებიდან", — განაცხადა ირმა ნადირაშვილმა

მისივე თქმით, მმართველმა გუნდმა შეიყვანა პატრიოტთა ალიანსი პარლამენტში და სწორედ ისინი არიან პასუხისმგებელი, რომ საქართველოს პოლიტიკაში არსებობს ჯგუფი, რომელიც ატარებს კრემლის ინტერესებს.

"გამოქვეყნდა დოკუმენტები და უბრალოდ, ტელევიზორს უნდა შეხედოთ და ნახოთ პუტინის ადმინისტრაციიდან როგორ ურჩევენ რაზე ისაუბრონ, როგორ არის მათთვის ფული გამოქვეყნებული", — განაცხადა ნადირაშვილმა.

24 აგვისტოს ცენტრ დოსიეს განკარგულებაში აღმოჩნდა სამუშაო დოკუმენტები, ანალიტიკური ანგარიშები, ფინანსური შეფასებები, წინასაარჩევნო მეთოდები და საოპერაციო მოხსენებები დაზვერვის გენერალ ჩერნოვის სამდივნოდან. მათი განცხადებით, ამ დოკუმენტებით ირკვევა, რომ რუსეთი საქართველოს არჩევნებში ჩარევასა და შედეგებზე გავლენის მოხდენას ცდილობს და სასურველი შედეგის მისაღწევად პატრიოტთა ალიანსს აფინანსებს, რომელიც ანტიდასავლური და პრორუსული რიტორიკით გამოირჩევა.

31 აგვისტოს კი პატრიოტთა ალიანსის რუსეთთან კავშირების შესახებ ცენტრმა დოსიემ ახალი მასალები გამოაქვეყნა, რომლებშიც ასახულია რუსული "კონტრარგუმენტები", ალიანსის ლიდერების ოკუპირებულ რეგიონში ვიზიტის გასამართლებლად.