ორშაბათს, 31 აგვისტოს, ლოს-ანჯელესის ოლქის პროკურორის ოფისმა განაცხადა, რომ პორნოვარსკვლავ რონ ჯერემის სექსუალური ძალადობის 20 ახალ შემთხვევაზე წაუყენებს ბრალი, რომლებშიც 13 ქალია ჩართული.

ბრალდებათა დიდ სიაში შედის ძალადობრივი გაუპატიურება, სექსუალური ხასიათის ცემა, ძალადობრივი ორალური კოპულაცია, უგონო ან მძინარე მსხვერპლის უცხო საგნით პენეტრაცია, გაუპატიურების მიზნით თავდასხმა და არასრულწლოვანთან შეუფერებელი ქცევა.

ჯერემის ახალი ბრალდებები იქიდან ორი თვის შემდეგ წაეყენა, რაც პორნოვარსკვლავს სამი ქალის გაუპატიურებასა და მეოთხის მიმართ სექსუალურ ძალადობაში დასდეს ბრალი.

ორშაბათს გამოცემული სასამართლოს საბუთების მიხედვით, ჯერემის 16-წლიან პერიოდში, 2004-იდან 2020 წლის 1-ლ იანვრამდე, ქალთა მიმართ ძალადობაში ედება ბრალი.

ჯერემის სავარაუდო მსხვერპლთაგან ყველაზე ახალგაზრდა 15 წლის გოგოა, რომლის მიმართაც მას 2004 წლის წვეულებაზე სექსუალური ძალადობა ედება ბრალად. ჩანაწერებში იტყობინება, რომ ინციდენტთაგან ექვსი ვესტ-ჰოლივუდის ბარში მოხდა, სადაც ჯერემი რეგულარული სტუმარი იყო, მეშვიდე კი — მის გარეთ მდებარე პარკინგზე.

ჯერემი სასამართლოს წინაშე მომავალ ორშაბათს, 7 სექტემბერს, წარდგება.

ლოს-ანჯელესის ოლქის პროკურორის ოფისის განცხადებით, თუკი ჯერემის ყველა ბრალი დაუმტკიცდა, მას ემუქრება "შესაძლო მაქსიმალური სასჯელი — სახელმწიფო ციხეში 250 წლით თავისუფლების აღკვეთა".