"პატრიოტთა ალიანსია პარტია, თორემ რისი პატრიოტები არიან" — ასე გამოეხმაურა ქართული ოცნების დეპუტატი, მამუკა მდინარაძე პატრიოტთა ალიანსის ირგვლივ განვითარებულ მოვლენებს. მისი თქმით, ამ ხალხისგან რუსულ წრეზე ტრიალი გასაკვირი არ არის.

"დღეს, უბრალოდ, ზოგადად, შეგვიძლია გავაკეთოთ პოლიტიკური განცხადება — არ გვიკვირს ჩვენ ამ ხალხისგან რუსულ წრეზე ტრიალი და რუსული კონტაქტები. არანაკლებ საშიშები არიან ერთმანეთზე ის ადამიანები, რომელებიც აშკარად რუსულ პოზიციებს აფიქსირებენ და ის ადამიანები, რომლებიც არ აფიქსირებენ და რუსულ საქმეს აკეთებენ. სამწუხაროდ, ძალიან ბევრი გვყავს ქვეყანაში ასეთი", — განაცხადა მდინარაძემ.

24 აგვისტოს ცენტრ დოსიეს განკარგულებაში აღმოჩნდა სამუშაო დოკუმენტები, ანალიტიკური ანგარიშები, ფინანსური შეფასებები, წინასაარჩევნო მეთოდები და საოპერაციო მოხსენებები დაზვერვის გენერალ ჩერნოვის სამდივნოდან. მათი განცხადებით, ამ დოკუმენტებით ირკვევა, რომ რუსეთი საქართველოს არჩევნებში ჩარევასა და შედეგებზე გავლენის მოხდენას ცდილობს და სასურველი შედეგის მისაღწევად პატრიოტთა ალიანსს აფინანსებს, რომელიც ანტიდასავლური და პრორუსული რიტორიკით გამოირჩევა.

31 აგვისტოს კი პატრიოტთა ალიანსის რუსეთთან კავშირების შესახებ ცენტრმა დოსიემ ახალი მასალები გამოაქვეყნა, რომლებშიც ასახულია რუსული "კონტრარგუმენტები", ალიანსის ლიდერების ოკუპირებულ რეგიონში ვიზიტის გასამართლებლად.