ქართული ოცნების აღმასრულებელი მდივანი, ირაკლი კობახიძე ნაციონალურ მოძრაობასა და პატრიოტთა ალიანსს "ერთი ბნელი მედლის ორ მხარეს" უწოდებს და ამბობს, რომ ისინი წლების მანძილზე აკეთებდნენ რუსულ საქმეს საქართველოში.

"სწორედ ეს არის მათთვის საერთო და ეს აერთიანებთ მათ. სწორედ ამიტომ სხედან ისინი ერთ მაგიდაზე. ვგულისხმობ, ნაციონალურ მოძრაობას, მის სატელიტებს, ასევე პატრიოტთა ალიანსსა და ბურჯანაძეს. ისინი რუსული საქმის გარშემო არიან გაერთიანებულები", — აცხადებს კობახიძე.

24 აგვისტოს ცენტრ დოსიეს განკარგულებაში აღმოჩნდა სამუშაო დოკუმენტები, ანალიტიკური ანგარიშები, ფინანსური შეფასებები, წინასაარჩევნო მეთოდები და საოპერაციო მოხსენებები დაზვერვის გენერალ ჩერნოვის სამდივნოდან. მათი განცხადებით, ამ დოკუმენტებით ირკვევა, რომ რუსეთი საქართველოს არჩევნებში ჩარევასა და შედეგებზე გავლენის მოხდენას ცდილობს და სასურველი შედეგის მისაღწევად პატრიოტთა ალიანსს აფინანსებს, რომელიც ანტიდასავლური და პრორუსული რიტორიკით გამოირჩევა.

31 აგვისტოს კი პატრიოტთა ალიანსის რუსეთთან კავშირების შესახებ ცენტრმა დოსიემ ახალი მასალები გამოაქვეყნა, რომლებშიც ასახულია რუსული "კონტრარგუმენტები", ალიანსის ლიდერების ოკუპირებულ რეგიონში ვიზიტის გასამართლებლად.