სამშენებლო კომპანია m2 ხე-მცენარეების მოჭრის პროცედურის გამარტივებას ითხოვს და შესაბამისი წერილით პარლამენტის თავმჯდომარეს, ირაკლი კობახიძეს მიმართავს. კომპანია მიიჩნევს, რომ დაავადებული ნარგავების მოჭრა კერძო მესაკუთრეს თანხის გადახდის გარეშე უნდა შეეძლოს და ქალაქის ინტერესში შედის, რომ დაავადებული მცენარეები დროულად მოიჭრას:

"მიგვაჩნია, რომ დაავადებული მწვანე ნარგავების მოჭრა მესაკუთრეს თავისი ტერიტორიის საზღვრებში უნდა შეეძლოს თანხის გადახდის გარეშე, რადგან დაავადებული ხე-მცენარეების არსებობა წარმოადგენს საშიშროებას სხვა, ქალაქის ტერიტორიაზე არსებული ნარგავების დაზიანების თვალსაზრისით და შესაბამისად, მათი დროული გაუვნებელყოფა შედის უმთავრესად ქალაქის ინტერესში."

წერილის თანახმად, აღნიშნული შესაძლებლობის გაჩენა ბიზნესის სტიმულირებას და ეკოლოგიურ მდგომარეობას გააუმჯობესებს:

"მოგეხსენებათ, თბილისის ტერიტორია არსებითად დაფარულია მწვანე საფარით, შესაბამისად, იმ შემთხვევაში, თუ არ იარსებებს ხის მოჭრის შესაძლებლობა ბიზნესი მნიშვნელოვნად შეფერხდება მსხვილი, ქვეყნისთვის სასიკეთო ეკონომიკური ეფექტის მქონე პროექტების განხორციელებაში და შეუძლებელი იქნება ტერიტორიების სამშენებლოდ განვითარება."

წერილში, რომელსაც კომპანიის გენერალური დირექტორი, ირაკლი ბურდილაძე აწერს ხელს, ნათქვამია, რომ მოქმედი კანონმდებლობით, კერძო მესაკუთრეს უწევს დაავადებული ხეების მოჭრის უფლების მოპოვება ქალაქ თბილისის მუნიციპალიტეტისაგან, ასევე, საკომპენსაციოდ იხდის გარკვეულ თანხას.