გიორგი ვაშაძე ხატია დეკანოიძის მის კონკურენტად დაყენებას ეხმიანება. ვაშაძის თქმით, შეთანხმებას, რომელიც ისნისა და სხვა მაჟორიტარულ ოლქებში ჰქონდათ, ნაციონალური მოძრაობა ამ გადაწყვეტილებით არღვევს.

ვაშაძე ამბობს, რომ ნაცვლად იმისა, ნაციონალური მოძრაობა მათ შეუერთდეს "დამსხვრეული ოცნებების" პარტიის დასამარცხებლად, იქ გადაწყვიტეს ოპოზიციური გაერთიანების შიგნით პოლიტიკური თამაშები ითამაშონ.

"ჩვენს თანამოქალაქეებს არ აინტერესებთ პოლიტიკური ინტრიგები, ისინი ჩვენგან ელიან სიღარიბისა და კრიმინალის დამარცხებას, "დამსხვრეული ოცნებების" პარტიის დამარცხებას. სულ ესაა, რაც შემიძლია გითხრათ. ჩვენ მოვიპოვებთ გამარჯვებას ისნის ოლქში "დამსხვრეული ოცნებების" პარტიის კანდიდატზე და ჩემთან, როგორც ამ ქვეყნის მომავალ პრემიერმინისტრთან ერთად, დავამარცხებთ კრიმინალსა და სიღარიბეს", — აცხადებს ვაშაძე.

ერთიანმა ნაციონალურმა მოძრაობამ ისანში მაჟორიტარობის კანდიდატი დაასახელა. როგორც ცნობილი გახდა, ისნის ოლქში მაჟორიტარობისთვის ვაშაძის წინააღმდეგ ხატია დეკანოიძე იბრძოლებს.

27 ივლისს, გიორგი ვაშაძემ და თაკო ჩარკვიანმა პოლიტიკურ პარტიათა კოალიცია, ძალა ერთობაშია დატოვეს და ახალი პოლიტიკური პლატფორმა, სტრატეგია აღმაშენებელი წარადგინეს. მათი განცხადებით, სტრატეგია აღმაშენებელი ამ ეტაპზე კიდევ ორ სუბიექტს — ახალი საქართველო და კანონი და სამართალს აერთიანებს.

კოალიციიდან წასვლის შემდეგ ვაშაძე ენმ-ს წევრებმა გააკრიტიკეს. მათ შორის, პარტიის ლიდერმა, მიხეილ სააკაშვილმა მისი წასვლა "ბნელ მხარეზე" გადასვლად შეაფასა. პასუხად ვაშაძემ ვარსკვლავური ომების პერსონაჟის ტანზე თავი მიიფოტოშოფა და დაპოსტა, რომ ბნელ ძალას დაამარცხებდა.

რაც შეეხება მაჟორიტარ კანდიდატებს, გიორგი ვაშაძე ოპოზიციის გაერთიანების საერთო კანდიდატებს შორის იყო დასახელებული იქამდე, სანამ ძალა ერთობაშიას დატოვებდა.