პოლიტიკური პარტია ტრიბუნას ლიდერი, დავით ჭიჭინაძე ახალ საარჩევნო ცვლილებებს ეხმიანება და ამას "არასერიოზულ განცხადებას უწოდებს". მისი თქმით, ერთადერთი, ვინც ქვეყანაში ამომრჩეველს აშინებს, ეს თავად ქართული ოცნებაა, რადგან სხვა პოლიტიკურ ძალას ამის რესურსი არ გააჩნია.

"რაღაც ქართული ოცნება სულ ახალ-ახალ აღმოჩენებს აკეთებს. ეტყობა საერთოდ ვერ წარმოუდგენიათ სად იმყოფებიან და ხელისუფლებას რომ წარმოადგენენ. მათი პრემიერმინისტრის განცხადებისა არ იყოს, რომ კიდევ უფრო უარესი იქნება ქვეყანაში ეკონომიკური სიტუაციაო, ესე მეგონა ოპოზიციონერი ლაპარაკობდა. ქვეყნის პირველი პირი, რომ წინასაარჩევნოდ ლაპარაკობს იმაზე, რომ ამ ქვეყანაში მომავალი წელი უარესი იქნება, რა განცხადებები უნდა იყოს გასაკვირი ქართული ოცნებისგან", — აცხადებს ჭიჭინაძე ტვ პირველთან საუბრისას.

ქართული ოცნება გამოდის ინიციატივით, საარჩევნო კოდექსში შევიდეს ცვლილება, რომლის თანახმადაც, მკაცრი სანქციები განისაზღვრება იძულების, დაშინებისა და ხმის მიცემის ფარულობის დარღვევის შემთხვევებზე. მმართველი გუნდის ლიდერისა და პარლამენტის თავმჯდომარის, არჩილ თალაკვაძის განცხადებით, საკანონმდებლო ცვლილებებს პარლამენტში დღეს დაარეგისტრირებენ და სექტემბერში რეგლამენტით გათვალისწინებულ სესიებზე განიხილავენ.