"ფიცი მწამს, ბოლო მაკვირვებს", — ასე ეხმაურება ევროპული საქართველოს დეპუტატი სერგი კაპანაძე ქართული ოცნების იდეას საარჩევნო კოდექსში ცვლილებებისა და წესების გამკაცრების შესახებ. მისი განცხადებით, შეზღუდვები საარჩევნო კოდექსში უკვე არსებობს, ხოლო ამგავრი ცვლილებით ქართული ოცნება ცდილობს საერთაშორისო დამკვირვებლებს მოაჩვენოს, რომ ხელისუფლება შეზღუდავს ამომრჩეველზე რაიმე ტიპის გავლენას.

"აი ამ ინიციატივაზე ითქმევა ზუსტად, ფიცი მწამს ბოლო მაკვირვებს. ეს ყველაფერი ისედაც დასჯადი იყო და როგორც ჩანს უნდა გამოჩნდნენ თეთრი და ფუმფულა საერთაშორისო დამკვირვებლებთან, რომ აი თურმე კანონში შეაქვთ ცვლილება. მთავარი პრობლემა არის, თუ ამ კანონის შემდეგ როგორ ასრულებენ და ვის მიმართ ასრულებენ", — განაცხადა კაპანაძემ.

მისივე თქმით, რეალური პრობლემა იქნება ცვლილებებიშ შემდეგში აღსრულება და ამას მმართველი გუნდი არ გააკეთებს.

"აქამდე არცერთი შემთხვევა არ ყოფილა, რომ ქართული ოცნების მიერ დაშინებული, მოსყიდული ან ამომრჩევლის იძულების გამო მომხარი რაიმე ფაქტი დასჯილიყო. არცერთი შემთხვევა არ ყოფილა, რომ რომელიმე საჯარო მოხელე, ან ქართული ოცნების თანამდებობის პირი ყოფილიყო დასჯილი. ჩვენ გვახსოვს ისეთი დიდი საქმეები, როგორებიცაა მაგალითად კერზაიას საქმე, როგორიცაა ძალადობა წინასაარჩევნო პერიოდში და არავინ არ დასჯილა.

ალბათ, არც ახლა იზამენ ამას, დარწმუნებული ვარ ამაში, იმიტომ, რომ ეს არის უბრალოდ თვალში ნაცრის შეყრა, რომ რაღაცის გაკეთება ვითომ უნდათ და აპირებენ", — განაცხადა სერგი კაპანაძემ.

ქართული ოცნება გამოდის ინიციატივით, საარჩევნო კოდექსში შევიდეს ცვლილება, რომლის თანახმადაც, ამომრჩევლის იძულება, დაშინება და ხმის მიცემის ფარულობის დარღვევა სისხლის სამართლის კოდექსით დასჯადი ქმედება გახდება.

მმართველი გუნდის ლიდერისა და პარლამენტის თავმჯდომარის, არჩილ თალაკვაძის განცხადებით, საკანონმდებლო ცვლილებებს პარლამენტში დღეს დაარეგისტრირებენ და სექტემბერში რეგლამენტით გათვალისწინებულ სესიებზე განიხილავენ.