ვეტერანების საქმეთა სახელმწიფო სამსახური 2017 წლის საახალწლო ღონისძიებისთვის 105 ათას ლარიან ტენდერს აცხადებს. გასართობი ღონისძება დაახლოებით 2 500 ბავშვისთვის ჩატარდება, რომელთა ასაკი 5-დან 12 წლამდეა. გასართობი მომსახურების შესაძენად უწყებამ ტენდერი 2016 წლის 13 დეკემბერს გამოაცხადა, წინადადებების მიღება კი 19 დეკემბერს სრულდება.

სატენდერო წინადადების მიხედვით, ღონისძიება 24-28 დეკემბრამდე პერიოდში ზუგდიდში, ბათუმში, ოზურგეთში, ქუთაისში, ახალციხეში, გორში, თელავსა და თბილისში ჩატარდება და 2 საათი გაგრძელდება.

გასართობი ღონისძიების მომსახურება ორი პუნქტისგან შედგება: საახალწლო პროგრამა და საახალწლო საჩუქარი.

საახალწლო პროგრამაში უნდა მონაწილეობდნენ Disney World-ის არანაკლებ 10 კოსტიუმირებული გმირი, თოვლის ბაბუა და ფიფქია. ღონისძიების ადგილზე განთავსებული უნდა იყოს: ნაძვის ხე (არანაკლებ 3 მეტრი) მორთული სათამაშოებით და განათებებით, ბუშტების გასაბერი, გასაბერი რინგის და ბატუტი და ფოტო სესიისთვის კუთხე. სატენდერო პირობებით, ღონისძიებას არანაკლებ ერთი ცნობადი სახე უნდა უძღვებოდეს, მუსიკალურად კი არანაკლებ ერთი DJ უნდა აფორმებდეს.

ღონისძიებაზე მიწვეულ ბავშვებს საჩუქრად ორი სახეობის Disney-ს გმირი, ვაფლის ფილა (45გრ), რძიანი შოკოლადი (20გრ), შოკოლადი (20გრ), შოკოლადის ფილა (2 ცალი); კარამელის კანფეტი (100 გრ), დიპლომი და ჯოხიანი ბუშტი გადაეცემათ.

შემსყიდველი ორგანიზაციის წერილობითი მოთხოვნის შემდგომ, პრეტენდენტი ვალდებულია არაუგვიანეს 2 სამუშაო დღის ვადაში წარადგინოს Disney World-ის, სანტა კლაუსის და ფიფქიას კოსტიუმები, გასაბერი რინგის, გასაბერი ბატუტის და სასაჩუქრე კომპლექტის ნიმუშები.