შატილის გზაზე მომხდარი ავტოავარიის შედეგად დაშავებული 3 პირის მდგომარეობა უკიდურესად მძიმეა. ამის შესახებ პირველ საუნივერსიტეტო კლინიკაში განაცხადეს, სადაც პაციენტები გუშინ გადაიყვანეს.

"სამი ქალბატონია შემოყვანილი კატასტროფის ბრიგადის მიერ უკიდურესად მძიმე მდგომარეობაში, პოლიტრამვის დიაგნოზით. არის სხვეულის მრავლობითი დაზიანებები, არის სუნთქვის უკმარისობა, არასტაბილური ჰერმოდინამიკა, ორის მდგომარეობა კრიტიკულია და ისინი რეანიმაციაში არიან, ერთთან მიმდინარეობს კვლევები", — აცხადებს გიორგი მძინარიშვილი, პირველი საუნივერსიტეტო კლინიკის ექიმი.

შინაგან საქმეთა სამინისტროს ცნობით, გარდაცვლილია 17 ადამიანი, მძიმედ დაშავდა — 3. შსს-ში აცხადებენ, რომ დაშავებულები მაშველებმა უსაფრთხო ადგილზე ამოიყვანეს, რის შემდეგაც სასწრაფო-სამედიცინო დახმარების ჯგუფებმა სამკურნალო დაწესებულებაში გადაიყვანეს.

ავტოსაგზაო შემთხვევა დუშეთის მუნიციპალიტეტში, სოფელ ბისოს სიახლოვეს, შატილის გზაზე მოხდა. სამგზავრო მიკროავტობუსი, დაახლოებით, 80 მეტრის სიმაღლიდან კლდოვან ფერდობზე გადავარდა. შინაგან საქმეთა სამინისტრომ მომხდარ ფაქტზე გამოძიება საქართველოს სსკ-ის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას ითვალისწინებს.