ქართულმა ოცნებამ დღეს თეთრიწყაროში მაჟორიტარი დეპუტატობის კანდიდატი წარდგინა. თბილისის მერმა, კახა კალაძემ, წარდგენაზე აღნიშნა, რომ მშვიდობიანი გზით გაისტუმრეს მთავრობა, რომელიც სიტყვისა და გამოხატვის თავისუფლებას ზღუდავდა.

"2012 წელს მართლაც მთელი თეთრი წყაროის სოფლები შემოვიარეთ და გვახსოვს როგორი რთული მდგომარეობა იყო. როდესაც ძალიან დიდი შიში და ზეწოლა იყო, ჩვენ ყველამ ერთიანი ძალისხმევით მშვიდობიანი არჩევნების გზით, როგორც ეს ნორმალურ, განვითარებულ ევროპულ ქვეყნებში ხდება, გავისტუმრეთ ხელისუფლება, რომელიც ყველაფერს აკეთებდა იმისთვის, რომ შეეზღუდა სიტყვისა და გამოხატვის თავისუფლება. ჩვენ ყველაფერი უნდა გავაკეთოთ, უნდა ვიმუშავოთ იმისთვის, რომ ჩვენი ქვეყანა რაც შეიძლება სწრაფად განვითარდეს ეკონომიკურად, რომ ჩვენი ქვეყნის თითოეულმა მოქალაქემ კეთილდღეობა იგრძნოს", —განაცხადა კალაძემ.