2016 წლის ნოემბერში, ოქტომბერთან შედარებით, ქვეყანაში შემოსული ფულადი გზავნილების ნაკადების მოცულობა 4,7 მილიონი ამერიკული დოლარით შემცირდა და 97,8 მილიონი ამერიკული დოლარი გახდა. თუმცა, 2016 წლის 15 დეკემბერს საქართველოს ფინანსთა სამინისტრომ ფულადი ნაკადების მოცულობების ზრდის შესახებ გაავრცელა ინფორმაცია.

ფინანსთა სამინისტროს განცხადებაში, 2016 წლის ნოემბრის თვის მონაცემები მხოლოდ 2015 წლის იმავე პერიოდთან იყო შედარებული და არა, იმავე წლის წინა თვის მონაცემებთან, როცა კლება დაფიქსირდა. თუ 2016 წლის ნოემბერს გასული წლის იმავე პერიოდს შევადარებთ, ამ შემთხვევაში, ფულადი გზავნილების მოცულობა 12,6 მილიონი ამერიკული დოლარით გაზრდილია.

საქართველოს ეროვნული ბანკის მიერ გამოქვეყნებული მონაცემების მიხედვით, 2016 წლის ნოემბერში, გასული წლის იმავე პერიოდთან შედარებით, ქვეყანაში შემოსული ფულადი გზავნილები გაზრდილია. თუმცა, 2015 წლის ნოემბერში, ბოლო 5 წლის განმავლობაში, იგივე პერიოდებთან შედარებით ყველაზე ნაკლები მაჩვენებელია დაფიქსირებული. 2016 წლის მონაცემები ჩამორჩება როგორც 2012 წლის, ასევე 2013 და 2014 წლის ნოემბერში ქვეყანაში შემოსულ ფულადი გზავნილების ნაკადს.

2016 წლის ნოემბერი, ბოლო 5 წლის განმავლობაში, იმავე პერიოდებთან შედარებით, საქართველოდან საზღვარგარეთ გადაგზავნილი თანხის მოცულობით ლიდერობს. წელს 17,1 მილიონი ამერიკული დოლარი გადაირიცხა საქართველოდან.

ეროვნული ბანკის ვებგვერდზე გამოქვეყნებული მონაცემებიდან ჩანს, რომ ყოველწლიურად (2012-2015) ნოემბერში ქვეყანაში შემოსული ფულადი გზავნილების მოცულობა ჩამორჩება წინა და მომდევნო თვის მონაცემებს.