Bloomberg-ის ინფორმაციით, თურქეთმა შავ ზღვაში სასარგებლო წიაღისეული, სავარაუდოდ, ბუნებრივი აირი აღმოაჩინა. გამოცემა წერს, რომ ეს ინფორმაცია ორმა პირმა მიაწოდა, რომლებსაც საკითხთან პირდაპირი შეხება აქვთ.

Bloomberg-ის მიხედვით, არ დაკონკრეტებულა აღმოჩენის სიგრძე და სიღრმე, არც ის, თუ რამდენად რთული იქნება წიაღისეულის მოპოვება. თუმცა, დეტალების გამჟღავნების შემდეგ თურქულმა ლირამ დოლართან მიმართებით პოზიციები გაიმყარა.

ამ განცხადებამდე თურქეთის პრეზიდენტმა, რეჯეპ ტაიპ ერდოღანმა თურქეთისთვის "კარგი ამბავი" დააანონსა. მან, ასევე, სადავო ხმელთაშუა ზღვაში სასარგებლო წიაღისეულის ძიების გაგრძელების პირობაც დადო, რამაც ევროკავშირის უკმაყოფილება გამოიწვია.

თურქეთის ენერგეტიკის მინისტრმა, ფატიჰ დონმეზმა ივლისში განაცხადა, რომ საბურღმა ხომალდმა ძიება ე.წ. ტუნა-1 ზონაში, თურქეთის ქალაქ ერეღლის მახლობლად დაიწყო. პრეზიდენტის ადმინისტრაციას საკითხზე, ჯერჯერობით, კომენტარი არ გაუკეთებია.

თურქეთი ნავთობსა და გაზს, საბერძნეთთან და კვიპროსთან ტერიტორიული დავის ფონზე, სადავო ხმელთაშუა წყლებშიც აქტიურად ეძებს.

ევროკავშირის ლიდერებმა უკვე დაგეგმეს საგანგებო შეხვედრა სექტემბერში, სადაც აღმოსავლეთ ხმელთაშუა ზღვაში მიმდინარე პროცესებზე იმსჯელებენ.