მწერალი მარგარეტ ეტვუდი და მსახიობი ჯეიმს ნორტონი იმ ცნობილ ადამიანებს შორის არიან, რომლებმაც პოლონეთის LGBTQ თემის მხარდასაჭერ ღია წერილს მოაწერეს ხელი.

ვებსაიტ Wyborcza.pl-ზე გამოქვეყნებული წერილი პოლონეთის მთავრობისგან "სექსუალური უმცირესობების დევნის შეწყვეტას" ითხოვს, ევროკავშირის კომისიის პრეზიდენტს კი პოლონეთში LGBTQ უფლებების დაცვის "მყისიერ ნაბიჯებისკენ" მოუწოდებს.

პოლონეთის პრეზიდენტი ანჯეი დუდა LGBTQ მოძრაობას კომუნიზმზე უფრო "დამანგრეველს" უწოდებს. ეს უცნაური არაა იმის გათვალისწინებით, რომ პოლონეთის მთავრობა LGBTQ თემის წინააღმდეგ ხშირად იყენებს წამქეზებლურ ფრაზებს.

პოლონეთი ამჟამად არ აღიარებს ერთნაირსქესიანთა კავშირებს — იქნება ეს საეკლესიო თუ სამოქალაქო ქორწინება. ერთნაირსქესიან წყვილებს კანონით ბავშვების აყვანაც ეკრძალებათ.

წერილი, რომელსაც ათობით მწერალმა, რეჟისორმა და მსახიობმა მოაწერა ხელი, მათ შორის ედ ჰარისმა, პედრო ალმოდოვარმა, დებორა ლევიმ, იზაბელ იუპერმა, ენ ენრაითმა, სტელან სკარსგარდმადა მაიკ ლიმ, ამ თვის დასაწყისში გამართულ საპროტესტო აქციებს უკავშირდება. წერილში წერია:

"პარასკევს, 2020 წლის 7 აგვისტოს, ვარშავაში 48 ადამიანი დააკავეს — ზოგი ძალიან სასტიკად — და დააპატიმრებს იმის საფუძველზე, რომ მათ უკანონო ძალადობრივ შეკრებაში მიიღეს მონაწილეობა. სინამდვილეში, ისინი LGBT+ აქტივისტის, მარგოს, მხარდასაჭერ მშვიდობიან პროტესტში მონაწილეობდნენ. [მარგო] ჰომოფობიური კამპანიის ფურგონის დაზიანებისთვის დაიჭირეს. მისმა ჯგუფმა აგრეთვე ცისარტყელის დროშებით შეამკო ქანდაკებები, მათ შორის ქრისტეს ქანდაკება".

ასტრონომ ნიკოლაი კოპერნიკის ქანდაკება LGBT დროშითა და ანარქისტული პირბადით

ფოტო: Marta Bogdanowicz

პრემიერ-მინისტრმა მატეუშ მორავეცკიმ იმ მოვლენების დროს აქტივისტები დაგმო და თქვა, რომ ეს ქანდაკებები მილიონობით პოლონელისთვის მნიშვნელოვან ღირებულებებს გამოხატავდა.

წერილში გრძელდება: "პოლონეთში ჰომოფობიური აგრესია გრძელდება, რადგან მას ხელს უწყობს მმართველი პარტია, რომელმაც სექსუალური უმცირესობები განტევების ვაცად აირჩია და რომელსაც არ ადარდებს მისი მოქალაქეების უსაფრთხოება და კეთილდღეობა".

წინა თვეში ევროკავშირმა თქვა, რომ ის უარს იტყოდა პოლონეთის იმ ექვსი ქალაქის დაფინანსებაზე, რომელმაც საკუთარი თავი "LGBT-სგან თავისუფალ ზონად" გამოაცხადა.

"[ევროკავშირის] წევრმა ქვეყნებმა და მათმა ხელისუფლებამ ევროკავშირის ღირებულებებსა და ძირითად უფლებებს აუცილებლად უნდა სცენ პატივი", — დატვიტა ევროკავშირის თანასწორობის კომისიონერმა ჰელენა დალიმ.