სამცხე-ჯავახეთში ევროპული საქართველოს წევრის, ზურაბ ჩილინგარაშვილის განცხადებით, პარტიის რამდენიმე წევრი, შესაძლოა, გადავიდეს ნაციონალური მოძრაობის რიგებში და ეს მათი არჩევანია. ასე უპასუხა მან On.ge-ს კითხვას გავრცელებულ ინფორმაციასთან დაკავშირებით, რომლის მიხედვით, ევროპული საქართველოს წევრები ენმ-ში გადავიდნენ.

ის უარყოფს, რომ პარტიის წევრები მხარს ერთიანი ნაციონალური მოძრაობის სავარაუდო კანდიდატს, ვაჟა ჩიტაშვილს დაუჭერენ. როგორც ჩილინგარაშვილი ამბობს, შესაძლოა, ევროპულ საქართველოში მყოფი ჩიტაშვილის 3-4 მეგობარი მას მხარს უჭერს, მაგრამ თუ ისინი საბოლოოდ თავიანთი პარტიის მიერ დაყენებულ კანდიდატს არ დაუჭერენ მხარს, პარტიის რიგების დატოვება მოუწევთ.

"სამცხე-ჯავახეთში ევროპული საქართველოს წევრები მხარს მხოლოდ ევროპული საქართველოს მიერ დაყენებულ კანდიდატს დაუჭერენ", — განაცხადა ზურაბ ჩილინგარაშვილმა On.ge-სთან.

მისივე თქმით, თუ სამცხე-ჯახახეთში ნაციონალური მოძრაობის კანდიდატი ვანო მერაბიშვილი იქნებოდა, მას ევროპული საქართველოს მხარდაჭერაც ექნებოდა, თუმცა ოპოზიციაში საერთო კანდიდატზე შეთანხმება არ შედგა.

"ჩვენი შეთანხმება ნაციონალურ მოძრაობასთან არ შედგა, აქედან გამომდინარე არავითარი მხარდაჭერა არ იქნება ნაციონალების მიერ დაყენებული კანდიდატების მიმართ ევროპული საქართველოს წარმომადგენლების მხრიდან. ვანო მერაბიშვილი რომ ყოფილიყო, აუცილებლად დავუჭერდით მხარს, იმიტომ, რომ ეს იყო შეთანხმება[ ოპოზიციურ პარტიებს შორის]. რახან თავად არ ისურვა კანდიდატობა, ეს შეთანხმება დამთავრებულია და თავისუფალი ვართ ყველანაირი ვალდებულებისგან, ამიტომ ვაყენებთ ჩვენს კანდიდატს", — განაცხადა ჩილინგარაშვილმა.

მისივე თქმით, ევროპული საქართველო ახალციხე-ადგიგენი-ასპინძა-ბორჯომის მაჟორიტარობის კანდიდატს დაახლოებით აგვისტოს ბოლოს დაასახელებს და პარტიის წევრები სწორედ მას დაუჭერენ მხარს. ამ ეტაპზე ოფიციალურად არ არის წარდგენილი არც ენმ-ის კანდიდატი, თუმცა არსებული ინფორმაციით, პარტია ვაჟა ჩიტაშვილს განიხილავს.

რაც შეეხება ერთიანი ნაციონალური მოძრაობის პასუხს გავრცელებულ ინფორმაციასთან დაკავშირებით, პარტიაში On.ge-ს ეს დაუდასტურეს, თუმცა არ ამბობენ, რამდენი ადამიანი გადავიდა მათთან. ენმ-ში მხოლოდ იმას ამბობენ, რომ ევროპული საქართველოდან მათ რიგებს რამდენიმე წევრი შეუერთდა.