საქართველოს მთავრობის ადმინისტრაცია ნიკა ჩერქეზიშვილის შესახებ განცხადებას ავრცელებს. მათი თქმით, ადმინისტრაცია პატივს სცემს აზრის გამოხატვის თავისუფლებას, თუმცა მიიჩნევს, რომ უკიდურესი ფორმების გამოყენება მიზნის მიღწევის საშუალება არ არის.

მწერალი ნიკა ჩერქეზიშვილი, რომელიც საგარეო საქმეთა სამინისტროს ადმინისტრაციულ დეპარტამენტში სახელმწიფო შესყიდვების უზრუნველყოფის დეპარტამენტის უფროსად მუშაობდა და სამსახურიდან გაათავისუფლეს, აღნიშნულს სახელმწიფო კანცელარიის წინ უკვე რამდენიმე დღე და ღამეა აპროტესტებს და შიმშილობს.

მთავრობის ადმინისტრაცია აცხადებს, რომ ისინი გაესაუბრნენ ნიკა ჩერქეზიშვილს და შენობაში შესვლაც შესთავაზეს, რაზეც მან უარი განაცხადა.

ადმინისტრაციის განცხადებით, შენობასთან მობილიზებულია სასწრაფო დახმარების ბრიგადა.

"თითქმის წელიწადნახევარია გავდივარ სხვადასხვა კონკურსზე და მიუხედავად ნაჩვენები დადებითი შედეგებისა, ვერ ვიწყებ მუშაობას, იმის გამო, რომ გაფუჭებული და გაშავებული მაქვს პირადი საქმე. ამ მოცემულობით, ფაქტობრივად, შანსი არ მაქვს, რომ დავსაქმდე და ვაკეთო ის საქმე, რაც მიყვარს და რაც კარგად ვიცი" - აცხადებს ნიკა ჩერქეზიშვილი.

თავად მთავრობის ადმინისტრაცია კი აცხადებს, რომ ნიკა ჩერქეზიშვილის საქმიანობის შეწყვეტა საგარეო უწყებაში სამართლებრივი პროცედურების სრული დაცვით განხორციელდა:

"ამაზე მოწმობს თბილისის საქალაქო სასამართლოს გადაწყვეტილებაც, რომლითაც ნიკოლოზ ჩერქეზიშვილის საჩივარი არ დაკმაყოფილდა.

ამასთან, ნიკოლოზ ჩერქეზიშვილს მონაწილეობა მიღებული აქვს იუსტიციის სამინისტროს მიერ გამოცხადებულ კონკურსში, რომლის პირველი ეტაპიც გაიარა, თუმცა, არაერთი შეტყობინების მიუხედავად, მეორე ეტაპზე - ტესტირებაზე არ გამოცხადდა".

მთავრობის ადმინისტრაციის განცხადება ნიკა ჩერქეზიშვილის შესახებ.

საქართველოს სახელმწიფო უწყებების, მათ შორის, მთავრობის ადმინისტრაციისა და საგარეო საქმეთა სამინისტროს წარმომადგენლებმა, არაერთი შეხვედრა გამართეს ნიკოლოზ ჩერქეზიშვილთან, რომელიც, საჯარო სამსახურში დასაქმების მოთხოვნით მჯდომარე აქციას მართავს.

პროტესტის პირველივე დღიდან, მთავრობის ადმინისტრაციის წარმომადგენლებმა, ნიკოლოზ ჩერქეზიშვილს შენობაში შესვლა შესთავაზეს, რაზეც მან უარი განაცხადა. ამასთან, მთავრობის ადმინისტრაციასთან, მუდმივად მორიგეობს სასწრაფო დახმარების ბრიგადა.

საგარეო საქმეთა სამინისტროსა და მთავრობის ადმინისტრაციის წარმომადგენლებთან გამართულ შეხვედრებზე, ნიკოლოზ ჩერქეზიშვილს განემარტა, რომ საგარეო უწყებაში მისი საქმიანობის შეწყვეტა სამართლებრივი პროცედურების სრული დაცვით განხორციელდა და ამაზე მოწმობს თბილისის საქალაქო სასამართლოს გადაწყვეტილებაც, რომლითაც ნიკოლოზ ჩერქეზიშვილის საჩივარი არ დაკმაყოფილდა.

ამასთან, ნიკოლოზ ჩერქეზიშვილს მონაწილეობა მიღებული აქვს იუსტიციის სამინისტროს მიერ გამოცხადებულ კონკურსში, რომლის პირველი ეტაპიც გაიარა, თუმცა, არაერთი შეტყობინების მიუხედავად, მეორე ეტაპზე - ტესტირებაზე არ გამოცხადდა.

ნიკოლოზ ჩერქეზიშვილს, რომელსაც საჯარო სამსახურში დასაქმების სურვილი აქვს, სახელმწიფო უწყებების წარმომადგენლებმა შეხვედრებზე მკაფიოდ განუმარტეს, რომ ამის მიღწევის ერთადერთი გზა კონკურსში მონაწილეობაა.

აღსანიშნავია, რომ საჯარო სამსახურის ბიუროს, ამჟამად ვაკანსია საჯარო სამსახურის 213 პოზიციაზე აქვს გამოცხადებული, მათ შორის, შესყიდვების მიმართულებით. საჯარო სამსახურის ბიურო განმარტავს, რომ საჯარო სამსახურში დასაქმების ერთადერთი, რეალური საშუალება სწორედ კონკურსში მონაწილეობაა.

ამის მიუხედავად ჩერქეზიშვილის მოთხოვნად რჩება იუსტიციის სამინისტროში დასაქმება, რაც ვერ განხორციელდება შესაბამისი ვაკანსიის არსებობის და კონკურსის გავლის გარეშე.