ინდურმა YES ბანკმა 60-მდე სახეობის ფინანსური სერვისის მიწოდება AI ბოტის საშუალებით WhatsApp-შიც დაიწყო.

Microsoft Azure-ის კოგნიტიური გამოთვლების საშუალებით, YES-ის საბანკო ციფრულმა ასისტენტმა 10 ათასამდე საბანკო მოთხოვნაზე პასუხის გაცემა ისწავლა. ბოტი ბუნებრივი ენის დამუშავების მექანიზმს, Microsoft Luis (Language Understanding Intelligent Service)-ს იყენებს, რომელიც სასაუბრო ხელოვნურ ინტელექტს მასშტაბურ ფინანსურ ცოდნასთან აერთიანებს, რაც საბანკო ამოცანების შესრულების გამარტივებას ემსახურება.

ამიერიდან ბანკის მომხმარებლებს WhatsApp-ის საშუალებით შეეძლებათ, მიიღონ დეტალური ინფორმაცია საკუთარი ანგარიშების, არასანქცირებული ტრანზაქციების, ბონუს ქულების განაღდების შესახებ. ჩატ ბოტს ასევე შეუძლია მომხმარებელი დააკავშიროს მომსახურების ცენტრთან და 60-ზე მეტ ფინანსურ პროდუქტთან მარტივი წვდომა უზრუნველყოს. გარდა ამისა, მომხმარებლებს შესაძლებლობა ექნებათ, მიიღონ ამომწურავი ინფორმაცია COVID-19-ით გამოწვეული დახმარების პაკეტის შესახებ.

"სიხარულით ვაცნობებთ მომხმარებლებს, რომ ამიერიდან მათ 24-საათიანი საბანკო მხარდაჭერის მიღება ცნობილი და ხშირად გამოყენებადი WhatsApp-ის პლატფორმის საშუალებით შეუძლიათ. მომხმარებლებისგან მიღებული საბანკო მოთხოვნები რეალურ დროში დამუშავდება. ასეთი სახით საბანკო საქმიანობა მეტად ეფექტიანი გახდება", — აცხადებს YES Bank-ის მთავარი ციფრული სერვისების დირექტორი, რიტეშ პაი.

ასევე იგეგმება YES ბოტის ინტეგრირება Alexa-სთან, გუგლ ასისტენტთან და Siri-სთან.

აღსანიშნავია, რომ YES Bank-ის ადგილობრივმა კონკურენტმა, Icici-მ განაცხადა, რომ მათი WhatsApp პლატფორმით, რომელიც სულ რაღაც 3 თვის წინ გამოჩნდა, უკვე მილიონამდე მომხმარებელი დაინტერესდა.