ქართული ოცნების ყოფილი წევრი და ამჟამად ლელოს ვაკის მაჟორიტარი დეპუტატობის კანდიდატი, ლევან კობერიძე კონკურენტ ელენე ხოშტარიაზე საუბრობს. მისი განცხადებით, მართალია, ხოშტარიამ ბოდიში მოიხადა, მაგრამ ეს არ ნიშნავს, რომ "პარტიული ნიშნით, შეხედულებების ნიშნით ვინმეს რაღაც არ გვახსოვს".

"ელენე იყო თავის დროზე იგივე ნაციონალური მოძრაობის დროს მინისტრის მოადგილე, როგორც მახსოვს. გასაგებია, რომ მან შემდეგ ბოდიში მოიხადა. ევროპული საქართველო, როდესაც პარლამენტში შემოსვლის შემდეგ გაემიჯნა ნაციონალურ მოძრაობას და გაიყვნენ, შიგნით მოხდა რაღაც განხეთქილება, რეალურად, პიროვნულად მეც ძალიან კარგი ურთიერთობა მაქვს ელენესთან, მაგრამ ეს არ ნიშნავს, რომ პარტიული ნიშნით, შეხედულებების ნიშნით ვინმეს რაღაც არ გვახსოვს, ან მომავალზე არ შეგვიძლია ვისაუბროთ, ამიტომ აქ მგონი ამაზე არ უნდა ვისაუბროთ. უნდა ვისაუბროთ იმაზე, თუ რას ვთავაზობთ მომავალში ჩვენს მოსახლეობას", — თქვა მან TV პირველი ეთერში.

კობერიძის აზრით, ვაკეში მისი და ელენე ხოშტარიას კონკურენციის შემთხვევაში, ქართული ოცნების კანდიდატს, პრაქტიკულად, კონკურენციისთვის ველი აღარ დარჩება.

"მე ვფიქრობ, რომ ძალიან კარგი კონკურენცია იქნება ვაკის რაიონში და მე მგონია, რომ სწორედ ქართულ ოცნებას, პრაქტიკულად, კონკურენციისთვის ველი აღარ დარჩება ჩემსა და ელენეს შორის კონკურენციის შემთხვევაში", — აცხადებს ლევან კობერიძე.

24 ივნისს ლელოს ლიდერმა, მამუკა ხაზარაძებ TV პირველის ეთერში განაცხადა, რომ არ გამორიცხავს, ვაკეში ოპოზიციის მაჟორიტარობის საერთო კანდიდატს, ელენე ხოშტარიას ლელომ კონკურენტი არ დაუყენოს, თუმცა 12 აგვისტოს ვაკის მაჟორიტარი დეპუტატობის კანდიდატად ლევან კობერიძე წარადგინა.

თავის მხრივ, ლევან კობერიძე ქართულ ოცნებას წარმოადგენდა. მან 18 ივნისს ანა დოლიძესთან, ლევან იოსელიანთან და ალეკო ელისაშვილთან ერთად პოლიტიკური პლატფორმა შექმნა, 11 აგვისტოს კი პოლიტიკურ გაერთიანება ლელოს შეუერთდა.

ელენე ხოშტარიამ 13 აგვისტოს დაწერა, რომ ლელოს მხრიდან ვაკეში კანდიდატურის წარდგენა მისთვის მოულოდნელობა იყო, თუმცა ამით მისი ლელოსადმი დამოკიდებულება არ იცვლება და მის წარმატებას კვლავ მნიშვნელოვნად მიიჩნევს საერთო კოალიციისთვის.

ლელომ მაჟორიტარობის კანდიდატები წარადგინა — სია

ალბათ, ელენე ხოშტარიას კონკურენტს არ დავუყენებთ — მამუკა ხაზარაძე