რამდენიმე დღის წინ ცნობილი გახდა, რომ სერიალი High Fidelity ერთი სეზონის შემდეგ გაუქმდა, რამაც ფანების ნაწილს გული დასწყვიტა. როგორც აღმოჩნდა, ამ გადაწყვეტილებას არ ეთანხმება შოუს ვარსკვლავი ზოი კრავიციც.

ამ სამწუხარო ინფორმაციის გავრცელებიდან მალევე ზოი კრავიცმა ინსტაგრამის პირად გვერდზე სერიალის გადასაღები მოედნიდან უცნობი კადრების გამოქვეყნებასთან ერთად გამოსამშვიდობებელი ტექსტი გაავრცელა:

"მინდა პატივი მივაგო ჩემს High Fidelity-ის ოჯახს. მადლობა იმ სიყვარულისა და ენთუზიაზმისთვის, რაც ამ შოუში ჩადეთ. ამის გამო თითოეულ თქვენგანს დიდ პატივს ვცემ. ასევე დიდ მადლობა მათ, ვინც გვიყურებდა, ვუყვარდით და მხარს გვიჭერდა. #განშორებაუსიამოვნოა".

როგორც Variety წერს, ამ ემოციურ გამოსამშვიდობებელ ტექსტს მრავალ ფანთან ერთად ისეთი ცნობილი სახეებიც გამოეხმაურნენ, როგორებიც არიან რიზ უიზერსპუნი, ჰალი ბერი და ტესა ტომპსონი.

"ძალიან მომენატრებით", — დაუკომენტარა ტესა ტოპსონმა ზოი კრავიცს, რაზეც ამ შოუს მთავარი როლის შემსრულებელმა ირონიულად უპასუხა:

"იმით მაინც შეგვიძლია დავიმშვიდოთ თავი, რომ Hulu-ს კიდევ ათასობით შოუ აქვს, სადაც არათეთრკანიანი ქალები თამაშობენ. ოჰ, არა, რაღაც ნამდვილად მეშლება".

ზოი კრავიცმა ამ კომენტარით შოუს დახურვის შემდეგ სტრიმინგ სერვისი Hulu ირიბად გააკრიტიკა გენდერული თუ რასობრივი ნიშნით მრავალფეროვანი პროექტების ნაკლებობის გამო.

High Fidelity-ის პრემიერა 2020 წლის თებერვალში შედგა და მან მალევე მრავალი მაყურებლის გული მოიგო. სერიალი ინგლისელი მწერლის ნიკ ჰორნბის 1995 წელს გამოქვეყნებულ ამავე სახელწოდების ცნობილ რომანს ეფუძნება, რომლის მიხედვითაც 2000 წელს სრულმეტრაჟიანი ფილმიც გადაიღეს, სადაც მთავარ როლს ჯონ კიუსაკი ასრულებს.

ახალი სატელევიზიო ეკრანიზაციის ძირითადი სიუჟეტური ხაზი მთავარი გმირის, ვინილების მაღაზიის მფლობელი რობის ირგვლივ ვითარდება, რომელიც პოპ კულტურის დიდი ფანია. სწორედ მის როლს ასრულებს 31 წლის ამერიკელი მსახიობი ზოი კრავიცი.

სტრიმინგ სერვისმა Hulu-მ სერიალის გაუქმების შესახებ ინფორმაცია ემის წლევანდელი დაჯილდოების ნომინანტების გამოქვეყნებიდან ერთ კვირაში გაავრცელა: High Fidelity-მა ვერც ერთი ნომინაცია ვერ მიიღო.