თბილისის მერის მოადგილე, ირაკლი ხმალაძე ჭავჭავაძის გამზირთან დაკავშირებით კრიტიკას ეხმაურება და აცხადებს, რომ ამის საფუძველს ვერ ხედავს. მისივე თქმით, რეფორმის შეფასება დღეს არასწორია, ახლადრეაბილიტირებულ ჭავჭავაძის გამზირზე საავტომობილო მოძრაობის სქემა სისტემურად შეიცვალა და ადაპტაციის პროცესს გარკვეული დრო დასჭირდება.

ხმალაძე ასევე აღნიშნავს, რომ ახლა "ინდივიდუალურ ტრანსპორტზე მორგებული სისტემიდან, გადავდივართ საზოგადოებრივ ტრანსპორტზე მორგებულ სისტემაზე".

"მოძრაობის სქემა სისტემურად შეიცვალა და ამასთან შეჩვევას შესაძლოა, გარკვეული დრო — რამდენიმე დღე ან ერთი-ორი კვირაც დასჭირდეს. ამიტომ შეფასებები დღეს არ უნდა გავაკეთოთ. ერთი რამ უნდა ვიცოდეთ, რომ რასაც ვაკეთებთ, ვაკეთებთ სწორედ იმ პოლიტიკის ჭრილში, რომელიც ყველას სჯერა, რომ სწორია და მივდივართ მხოლოდ და მხოლოდ ამ გზით. აქედან გამომდინარე, მე ვერც პანიკის და ვერც კრიტიკის საფუძველს ვხედავ", — განაცხადა ირაკლი ხმალაძემ.

მისივე თქმით, "შეფერხებები იქნება ხვალაც, ზეგაც, მაგრამ რამდენიმე დღეში, შეიძლება ერთ კვირაშიც, ყველაფერი ჩადგება ფორმაში და დარეგულირდება". ვიცე-მერი აღნიშნავს, რომ ჭავჭავაძეზე ჩატარებული სამუშაოების შედეგად, გამზირის გამტარუნარიანობა გაიზარდა.

რაც შეეხება საცობებს, ამ შემთხვევაში ირაკლი ხმალაძე ქალაქის წინა მმართველებზე მიუთითებს და ამბობს, რომ პრობლემაა სატრანსპორტო სისტემის ის პოლიტიკა, რომელსაც მუნიციპალიტეტი წლების განმავლობაში ატარებდა და რომლის შედეგადაც "შეუსაბამოდ დიდი რაოდენობით სატრანსპორტო საშუალებები მივიღეთ".

"გაიხსენეთ, სამი წლის წინ რა იყო მოსახლეობის მთავარი დაკვეთა ადგილობრივი თვითმმართველობის არჩევნებზე. ყველაზე მწვავე პრობლემა იყო საცობი და სატრანსპორტო საშუალებების გამონაბოლქვი. ჩვენ თუ არ მოვინდომეთ, რომ ნაკლებმა მანქანამ იაროს ქალაქში და ნაკლებად გადავაადგილდეთ მანქანებით, ჯადოსნური ჯოხით ხომ არ შევამცირებთ ჰაერის დაბინძურებას, ან საცობებს როგორ განვტვირთავთ?", — აცხადებს ვიცე-მერი.

დღეს თბილისის მერიის მისამართით კრიტიკა გამოიწვია საცობებმა ვაკეში, მეტწილად, ჭავჭავაძის გამზირზე. მოქალაქეები ამას გამზირის რეაბილიტაციას უკავშირებენ, რის შედეგადაც ავტომობილების სავალი ზოლი შემცირდა, ავტობუსების გაჩერებები კი ქუჩის შუაში დამონტაჟდა.