ამერიკული ტელეარხის, NBC-ის ინფორმაციით, ამერიკის შეერთებული შტატების არჩეული პრეზიდენტი, დონალდ ტრამპი გეგმავს, სახელმწიფო მდივნის პოსტზე წარადგინოს ნავთობკომპანია ექსონ მობილის პრეზიდენტი რექს ტილერსონი. ტელეარხი აღნიშნულ ინფორმაციას საქმის კურსში მყოფ ორ სხვადასხვა წყაროზე დაყრდნობით ავრცელებს.

როგორც ტელეარხი აცხადებს, რექს ტილერსონი ექსონ მობილში 2004 წლიდან მუშაობს, ამ კომპანიას კი აქვს ბიზნეს ინტერესები რუსეთში, თავად ტილერსონს კი მჭიდრო კავშირები აქვს რუსეთის პრეზიდენტთან, ვლადიმერ პუტინთან.

მართალია, ტრამპის ოფისს აღნიშნული ინფორმაცია ოფიციალურად არ დაუდასტურებია, თუმცა NBC-ის ტრამპის პრესსპიკერმა უთხრა, რომ 12 დეკემბერს დონალდ ტრამპი ნიუ–იორკში ნამდვილად შეხვდა ტილერსონს.

ტილერსონმა 2011 წელს რუსეთის ხელისუფლებასთან გააფორმა ხელშეკრულება, რათა მის კომპანიას დაეწყო არქტიკაში არსებული ნავთობის მარაგის ათვისება, თუმცა, ეს ხელშეკრულება გაიყინა აშშ–ს მიერ რუსეთისთვის ყირიმის ოკუპაციისთვის დაწესებული სანქციების შედეგად.

ექსონ მობაილის პრეზიდენტმა საჯაროდ არაერთხელ გააკრიტიკა აშშ–ს ხელისუფლება რუსეთისთვის დაწესებული სანქციების გამო და მას " დიდი ზიანის მომტანი" უწოდა.

სახელმწიფო მდივნის პოსტი გავლენითა და მნიშვნელობით მეოთხეა ამერიკის შეერთებულ შტატებში პრეზიდენტის პოსტის შემდეგ. სწორედ სახელმწიფო მდივანია პასუხისმგებელი ქვეყნის საგარეო პოლიტიკაზე. სახელმწიფო მდივნის კანდიდატურას სენტას პრეზიდენტი წარუდგენს. სწორედ სენატმა უნდა დაამტკიცოს პრეზიდენტის მიერ წარდგენილი პირი ამ პოსტზე.

აღნიშულ ინფორმაციას წინ უძღოდა ცენტრალური სადაზვერვო სააგენტოს (CIA) მიერ განცხადების გავრცელება იმის შესახებ, რომ რუსეთის ფედერაციის დაზვევრვა აშშ–ს საპრეზიდენტო არჩევნებში ჩაერია ტრამპის სასარგებლოდ. აღნიშნულის გამო, ტრამპის ოფისმა CIA მკაცრად გააკრიტიკა.