თუ დიდი ხანია ეძებთ Call Me By Your Name-ის ატმოსფეროთი ახალ სანახაობას, დიდხანს ლოდინი აღარ დაგჭირდებათ — ლუკა გუადანინომ თინეიჯერების სირთულეებით სავსე ცხოვრების შესახებ რვაეპიზოდიანი სერიალი გადაიღო.

We Are Who We Are — ასე ჰქვია ახალ სერიალს, რომელზეც ლუკა გუადანინომ HBO-სთვის იმუშავა. ეს ამ ცნობილი იტალიური წარმოშობის რეჟისორის პირველი სატელევიზიო პროექტია.

სერიალის სიუჟეტი 14 წლის ფრეიზერზე მოგვითხრობს, რომელიც ნიუ-იორკიდან იტალიაში მშობლებთან ერთად სამხედრო ბაზარზე ჩადის, სადაც ამავე ბაზაზე მცხოვრებ კეიტლინს გაიცნობს და დამეგობრდებიან. სწორედ აქედან იწყება მათი ცხოვრების მნიშვნელოვანი ეტაპი, როცა მოუწევთ რთული დილემების პირისპირ აღმოჩენილი ძვირფასი ურთიერთობები გადაარჩინონ.

სერიალში მთავარ როლებს IT-ის ვარსკვლავ ჯეკ დილან გრეიზერი და დამწყები ახალგაზრდა მსახიობი ჯორდან სიმონი ასრულებენ. შოუში ასევე ვიხილავთ მარტინ სკორსეზეს შვილ ფრანჩესკა სკორსეზეს და ცნობილ მომღერალს Kid Cudi.

"Call Me By Your Name წარსულზეა, რომელიც კინოკამერის საშუალებით ეკრანზე გავაცოცხლე, ეს სერიალი კი იმ ყველაფერზეა, რაც აქ და ახლა ხდება. ეს არის აწმყოს სხეულებსა და სულებზე. სწორედ ამის გამო მგონია, რომ ეს პროექტები ძალიან განსხვავდება ერთმანეთისგან", — განაცხადა ლუკა გუადანინომ.

We Are Who We Are-ის პრემიერა 14 სექტემბერს შედგება.

შეგახსენებთ, რომ ეს ერთადერთი ახალი პროექტი არ იყო, რომელზეც ლუკა გუადანინო მუშაობდა: ის ამავდროულად საკულტო ფილმ Scarface-ის მიხედვით ახალ ფილმს გადაიღებს და ერთგულ მაყურებლებს 2017 წელს გამოსული დრამატული სასიყვარულო ისტორიის Call Me by Your Name-ის გაგრძელებას შესთავაზებს, სადაც კვლავ ტიმოთი შალამე და არმი ჰამერი ითამაშებენ.