ევროპული საქართველო ოპოზიციურ პარტიებს საერთო მაჟორიტარ კანდიდატებზე შესაჯერებლად კონსულტაციების განახლებისკენ მოუწოდებს. ევროპული საქართველოს ლიდერმა, გიგი უგულავამ მოუწოდა ნაციონალურ მოძრობას, რომ ამ მიმართულებით მათთან თანამშრომლობა გააგრძელონ.

უგულავამ ბრიფინგზე აღნიშნა, რომ ენმ-სთან რეგიონებში საერთო კანდიდატებზე კონსულტაციები ჰქონდათ, თუმცა პარტიის პოზიციაა, რომ თბილისს გარეთ, 22 ოლქში საკუთარი კანდიდატი ჰყავდეთ.

"არ გვინდა, კარი დავუხუროთ ერთიან ნაციონალურ მოძრაობას და თუ ისინი გადაწყვეტენ, შეიცვლიან თავიანთ პოზიციას, უახლოესი ორი-სამი დღის განმავლობაში, შემოგვიერთდნენ და კვლავ გავაგრძელოთ, რათა სწრაფად დავასრულოთ ეს პროცესი.

თუ მათი ეს სურვილი არ იქნება, ბუნებრივია, ყველა სხვა დანარჩენმა პარტიებმა, ვინც ვთანამშრომლობთ ერთიან ფორმატში, უახლოეს დღეებში, შევჯერდეთ და წარვადგინოთ გამსხვილებული მაჟორიტარები", — განაცხადა უგულავამ.

საკონსულტაციო ფორმატში გაერთიანებულმა ოპოზიციამ თბილისის 8 მაჟორიტარულ ოლქში საერთო კანდიდატი წარადგინა. უგულავამ ნაციონალურ მოძრაობას მადლობა გადაუხადა თბილისის მაჟორიტარ კანდიდატებზე თანამშრომლობისთვის და აღნიშნა, რომ ამ შეთანხმებას უნდა დაეფუძნოს ოპოზიციის საერთო კოორდინაცია.