პრემიერმინისტ გიორგი გახარიას განცხადებით, მთავრობამ მიიღო გადაწყვეტილება, რომ გარდაბნის სოფლებში არსებულ ბაზრებსა და ბაზრობებზე გამკაცრდეს კონტროლი, რაც მოიცავს, თერმოსკრინინგსა და ტესტირებას. ამის შესახებ მან დღეს, 23 ივლისის მთავრობის სხდომის დაწყებამდე ისაუბრა. მისივე თქმით, სიტუაციის გამწვავების პირობებში, საკარანტინე ზომებისთვისაც უნდა იყოს მზადყოფნა.

"ბოლო დღეების განმავლობაში, სამწუხაროდ, ქვეყანაში მკვეთრი ზრდა ფიქსირდება. გვმართებს უაღრესი ყურადღება. განსაკუთრებით ყურადღებას იპყრობს ის, რომ ინფექცია გავრცელებულია გარდაბნის სოფლებში და ბევრი ჩვენი მოქალაქე ამ სოფლებიდან შრომობს თბილისის ბაზრებზე", — თქვა გიორგი გახარიამ.

საქართველოს ჯანდაცვის მინისტრი, ეკატერინე ტიკარაძე გარდაბნის მოსახლეობას თხოვნით მიმართავს, რომ ითანამშრომლონ ეპიდემიოლოგებთან, რომლების ამ მომენტისთვის იმყოფებიან გარდაბანში, ატარებენ აქტიურ თერმოსკრინინგს და მიზნობრივ ტესტირებას.

როგორც დაავადებათა კონტროლის ცენტრის ხელმძღვანელი, ამირან გამყრელიძე აღნიშნავს, თუ გარდაბნის სოფლებში კორონავირუსის ტესტირებაზე მოსახლეობის დამყოლობა არ იქნება, შესაძლოა, რომ ეს სოფლები ჩაიკეტოს. ამის შესახებ გამყრელიძემ დღეს გამართულ ბრიფინგზე განაცხადა.

საქართველოში 22 ივლისს კორონავირუსის 24 ახალი შემთხვევა დაფიქსირდა, 23 ივლისს კი 12. ჯანდაცვის მინისტრი აღნიშნავს, რომ ახალი 24 შემთხვევა საყურადღებოა, თუმცა არა საგანგაშო და მნიშვნელოვანია, ყველა ის რეკომენდაცია, რომელიც მოწოდებულია მსოფლიო ჯანდაცვის ორგანიზაციისგან, ჯანდაცვის სამინისტროსა და დაავადებათა კონტროლის ცენტრისგან, ზედმიწევნით იყოს დაცული.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: