"ნუ მოკლავ! გამოიძიე დანაშაული", — ამ სლოგანით შინაგან საქმეთა სამინისტროსთან საპროტესტო აქცია მიმდინარეობს. აქციის ორგანიზატორია მოძრაობა შეცვალე და მას მოძრაობები გაბედესა და სირცხვილიას წევრებიც უერთდებიან. აქცია წუთიერი დუმილით დაიწყო.

როგორც აქციის ორგანიზატორები აცხადებენ, ბოლო დროის გახმაურებულ საქმეებზე შსს-ს მიმართ არაერთი კითხვა გაჩნდა და ისინი უწყებას უმოქმედობასა და არაეფექტურობაში ადანაშაულებენ.

ფოტო: ქეთი ღვინიაშვილი / On.ge

აქციაზე იხსენებენ 19 წლის ფეხბურთელ გიორგი შაქარაშვილსა და 23 წლის თამარ ბაჩალიაშვილს, რომელსაც ხუთი დღის განმავლობაში ეძებდნენ და დღეს, 22 ივლისს იპოვეს.

"ეს ეხება ყველა იმ საქმეს, რომელიც ნელ-ნელა ჯაჭვით აეწყო ქართული ოცნების მმართველობას და გადაება ერთმანეთს. მომავალში მე და თქვენ რომ არ აღმოვჩნდეთ იმ სიტუაციაში, რაშიც გუშინ თამარის [ბაჩალიაშვილის] ოჯახი აღმოჩნდა, უნდა გამოვიდეთ გარეთ", — განაცხადა აქციის ერთ-ერთმა მონაწილემ.

აქციაზე ორგანიზატორებმა გააჟღერეს, რომ აპირებენ ეს პროცესი გახდეს უწყვეტი, სანამ ყველა დამნაშავე არ დაისჯება.