"ჩვენ ისეთი რეალობა მივიღეთ, რომ სახელმწიფო პირდაპირ კონკურენციაში უდგას კერძო ბიზნესს, ვგულისხმობ მუსიკალურ ინდუსტრიას" - თქვა კომპანია AlterVision-ის წარმომადგენელმა დათო ცინცაძემ რუსთავი 2-ის გადაცემა ბიზნესკურიერში კულტურის სამინისტროს 29 მილიონიან პროექტზე.

ცინცაძის თქმით, კულტურის სამინისტროს პროექტი Check In Georgia არათუ ეხმარება მათ, არამედ რთულ პირობებშიც აყენებს.

Tbilisi Open Air-ის ორგანიზატორის თქმით, სახელმწიფოს მიერ 100%-ით დაფინანსებული კონცერტები ქვეყნისთვის წამგებიანია:

"ფაქტია, რომ 100%-ით ბიუჯეტიდან დაფინანსებული მუსიკალური ივენთები არის ქვეყნისთვის წამგებიანი. ეს მოდელი არ მუშაობს. ცალკე პრობლემაა, რომ მოსახლეობა ბილეთებში ფულს იხდის.

გამჭვირვალობის დასკვნაც რომ მოვიშველიოთ, კულტურის სამინისტროს აქვს როგორც მინიმუმ ნეპოტიზმის, ცუდი მენეჯმენტისა და ინტერესთა კონფლიქტის პრობლემა".

Check in Georgia სამთავრობო პროექტია, რომლისთვისაც მთავრობის სარეზერვო ფონდიდან დაახლოებით 29 მილიონი ლარია გამოყოფილი. პროექტის ფარგლებში საქართველოში მთელი წლის განმავლობაში სხვადასხვა გასართობი ღონისძიებებია დაგეგმილი, მათ შორის რობი უილიამსის, Maroon 5-ის, ხოსე კარერასის, ეროს რამაზოტისა და სხვათა კონცერტები.