ქართული ოცნების მაჟორიტარობის კანდიდატი ბექა ოდიშარია ფიქრობს, რომ მისი "სამი თაობის მთაწმინდელობა" საქილიკო არ არის და საამაყოა. მისი თქმით, ყველა მაჟორიტარს უნდა ჰქონდეს გარკვეული ბმა იმ ადგილთან, რომელსაც წარმოადგენს. რაც შეეხება მის "ბმას" მთაწმინდასთან, დეპუტატი ხაზს უსვამს, რომ ის და მამამისი მთაწმინდაზე დაიბადნენ, მისი შვილები კი "პირველსკოლელები არიან".

"მე ვფიქრობ, რომ საქილიკო არ არაფერი არ გახლავთ, ცუდი აქ არაფერი არ არის. ყველა მაჟორიტარს უნდა ჰქონდეს, ბუნებრივია, რაღაც გარკვეული ტიპის ბმა. უკეთესია, შესაძლებელია, სხვაგვარადაც იყოს, მაგრამ მე ვფიქრობ, რომ ის, რომ მე დავიბადე მთაწმინდაზე, მათ შორის მამაჩემიც და შემიძლია გითხრაც, რომ ჩემი შვილებიც პირველ სკოლელები არიან, ამით ვფიქრობ, არაფერი დაგვიშავებია და არაფერი დაუშავდება მთაწმინდას. შესაძლებელია, ამით ხაზი გაესვა იმას, რომ მე მიუხედავად იმისა, რომ კრწანისის მაჟორიტარი ვარ, მთაწმინდას, მის ყოფას, მის პრობლემებს არასდროს არ მოვწყვეტილვარ და ფორმაში შესვლა არ დამჭირდება ნამდვილად მთაწმინდაზე", — განაცხადა მან რუსთავი 2-ის ეთერში.

გარდა ამისა ოდიშარიამ აღნიშნა, რომ მისი წარდგენისას კობახიძემ მოქმედი მაჟორიტარობაც ახსენა და ის "არც თუ ისე ცუდი" მაჟორიტარია.

"მე მოქმედი მაჟორიტარი ვარ და ვფიქრობ, არც თუ ისე ცუდი და ამაზე შეგიძლიათ, კრწანისის მოსახლეობასთან გქონდეთ კომუნიკაცია. ისევე, როგორც ჩემი დამოკიდებულება დიასპორის მიმართ და ის აქტივობები, რომელიც ამ პეროდში იქნა, სწორედ დიასპორის როლის გასააქტიურებლად, ქვეყნის ცხოვრებაში ჩასართველად გაკეთებული ჩვენი კომიტეტის მიერ", — განაცხადა ოდიშარიამ.

"სამი თაობის მთაწმინდელი", — ეს სიტყვები გამოიყენა ქართული ოცნების საარჩევნო შტაბის უფროსმა, ირაკლი კობახიძემ მთაწმინდის მაჟორიტარ დეპუტატად ბექა ოდიშარიას წარდგენისას.

20 ივლისს ქართულმა ოცნებამ მაჟორიტარი დეპუტატობის კანდიდატები წარადგინა. მაჟორიტარების სიაში ძირითადად ოცნების ძველი სახეები არიან, მათ შორის ქალი მხოლოდ ერთია. მაჟორიტარად არ წარუდგენიათ იმ დეპუტატების ნაწილი, რომლებმაც მაჟორიტარული სისტემის უპირატესობის მოტივით პროპორციული კანონპროექტი ჩააგდეს.

გაიგეთ მეტი "ოცნების" მაჟორიტარების წარდგენაზე: