დიდი ბრიტანეთი ბრექსიტსა და შოტლანდიის არჩევნებში რუსეთის ჩარევაზე საუბრობს. პარლამენტის სადაზვერვო და უშიშროების კომიტეტმა ბრექსიტსა და შოტლანდიის არჩევნებში რუსეთის ჩარევასთან დაკავშირებით გამოაქვეყნა ანგარიში, რომელიც გასულ წელს უნდა გასაჯაროვებულიყო, თუმცა ვადამდელი არჩევნების გამო გადაიდო.

"არსებობს სანდო წყარო, რომლის თანახმად, რუსეთმა 2014 წელს შოტლანდიის დამოუკიდებლობის რეფერენდუმთან დაკავშირებით გავლენის კამპანიები ჩაატარა", — ნათქვამია ანგარიშში.

კომიტეტის წევრების თქმით, დანამდვილებით შეუძლებელია იმის თქმა, წარმატებით ჩაერია თუ არა რუსეთი ბრექსითის საქმეში, რადგან ეს არავის გამოუძიებია.

აღსანიშნავია, რომ ბრექსითის რეფერენდუმის დროს კრემლის პროპაგანდისტული მედიები, RT და Sputnik ევროკავშირის საწინააღმდეგო ინფორმაციას ავრცელებდნენ და ბრექსითს მხარს უჭერდნენ. კვლევებში ჩანს, რომ რუსეთი გავლენის მოსახდენად სოციალურ ქსელში ბოტებსა და ტროლებს იყენებდა.

"როგორც ჩანს, რუსეთი დიდ ბრიტანეთს დასავლეთში ერთ-ერთ მთავარ სამიზნედ აღიქვამს", — აღნიშნულია ანგარიშში.

მოხსენებაში ნათქვამია, რომ რუსეთი მტრული ძალაა, რომელიც გაერთიანებულ სამეფოსა და მთელ დასავლეთს ჯაშუშობით, არჩევნებში ჩარევითა და ფულის გათეთრებით საფრთხეს უქმნის.