იუსტიციის მინისტრი, თეა წულუკიანი კითხვაზე, იქნება თუ არა ქართული ოცნების პროპორციულ სიაში, პასუხობს, რომ სიაზე მუშაობა ჯერ არ დასრულებულა. მისი თქმით, ის წინასაარჩევნო კამპანიაში ისე იქნება ჩართული, როგორც 2011 წლიდან იყო.

"საარჩევნო სიაზე მუშაობა მიმდინარეობს, ეს სია ჯერ მზად არ არის, როგორც ეს ქართული ოცნების არაერთ სხვა ლიდერს თქვენთვის განუცხადებია, ეს არის რეალობა და ამიტომ დაველოდოთ დაველოდოთ იმ სიას, რომელიც შედგება", — განაცხადა წულუკიანმა.

მედიაში ვრცელდებოდა ინფორმაცია, რომ თეა წულუკიანი ქართული ოცნების მაჟორიტარობის კანდიდატი ნაძალადევის რაიონში იქნებოდა, თუმცა წულუკიანის ნაცვლად მმართველმა გუნდმა ნაძალადევში მაჟორიტარად მიხეილ ყაველაშვილი წარადგინა.

დღეს, 20 ივლისს ქართულმა ოცნებამ მაჟორიტარი დეპუტატობის კანდიდატები წარადგინა. მაჟორიტარების სიაში მოხვდნენ ოცნების, როგორც ძველი, ასევე, ახალი სახეები, მათ შორის ქალი მხოლოდ ერთია. მაჟორიტარად არ წარდუგენიათ იმ დეპუტატების ნაწილი, რომლებმაც მაჟორიტარული სისტემის უპირატესობის მოტივით პროპორციულს კანონპროექტი ჩააგდეს.

გაიგეთ მეტი "ოცნების" მაჟორიტარების წარდგენაზე:

შეგახსენებთ, რომ მას შემდეგ, რაც მმართველი გუნდის ლიდერმა, ბიძინა ივანიშვილმა პირობა არ შეასრულა და პროპორციული საარჩევნო სისტემის კანონპროექტი ჩავარდა, ოპოზიცია ბოიკოტის რეჟიმში გადავიდა. საპროტესტო აქციების, პარლამენტის პიკეტირებების, აქციების დაშლისა და ფასილიტატორი ელჩების ჩართვის შემდეგ, ოპოზიცია და მმართველი გუნდი ახალ "თითქმის პროპორციულ" საარჩევნო სისტემაზე შეთანხმდა, რომლის მიხედვითაც პარლამენტში საარჩევნო სიით 120 დეპუტატი შევა, 30-ს კი მაჟორიტარულ ოლქებში აირჩევენ. საპარლამენტო არჩევნები 2020 წლის ოქტომბერში სწორედ ამ სისტემით ჩატარდება.