იუსტიციის მინისტრის, თეა წულუკიანის თქმით, ქართული ოცნების გუნდი იმ ხაზს გააგრძელებს, რაც 2012 წელს დაიწყო. ასე უპასუხა მან ჟურნალისტის კითხვას, აპირებს თუ არა ქართული ოცნება, წინასაარჩევნო კამპანია ისევ წინა ხელისუფლების კრიტიკაზე ააგოს.

"ჩვენი გეგმა და პროგრამა არის ის, რომ გავაგრძელოთ ის ხაზი, რაც დავიწყეთ 2012 წელს. ჩვენ 2012 წელს საფუძველი ჩავუყარეთ მშვიდობიან და სტაბილურ პირობებში, მიუხედავად ოკუპაციისა, მიუხედავად მრავალმხირივი გეოპოლიტიკური გამოწვევებისა, ჩვენს ქვეყანაში წინსვლას, ადამიანის უფლებების დაცვას და ძლიერი სახელმწიფოს მშენებლობას ევროპული ინტეგრაციის გზაზე. აი, ეს არის ჩვენი საბოლოო მიზანი", — განაცხადა თეა წულუკიანმა.

დღეს, 20 ივლისს ქართულმა ოცნებამ მაჟორიტარი დეპუტატობის კანდიდატები წარადგინა. მაჟორიტარების სიაში მოხვდნენ ოცნების, როგორც ძველი, ასევე, ახალი სახეები, მათ შორის ქალი მხოლოდ ერთია. მაჟორიტარად არ წარდუგენიათ იმ დეპუტატების ნაწილი, რომლებმაც მაჟორიტარული სისტემის უპირატესობის მოტივით პროპორციულს კანონპროექტი ჩააგდეს.

გაიგეთ მეტი "ოცნების" მაჟორიტარების წარდგენაზე:

შეგახსენებთ, რომ მას შემდეგ, რაც მმართველი გუნდის ლიდერმა, ბიძინა ივანიშვილმა პირობა არ შეასრულა და პროპორციული საარჩევნო სისტემის კანონპროექტი ჩავარდა, ოპოზიცია ბოიკოტის რეჟიმში გადავიდა. საპროტესტო აქციების, პარლამენტის პიკეტირებების, აქციების დაშლისა და ფასილიტატორი ელჩების ჩართვის შემდეგ, ოპოზიცია და მმართველი გუნდი ახალ "თითქმის პროპორციულ" საარჩევნო სისტემაზე შეთანხმდა, რომლის მიხედვითაც პარლამენტში საარჩევნო სიით 120 დეპუტატი შევა, 30-ს კი მაჟორიტარულ ოლქებში აირჩევენ. საპარლამენტო არჩევნები 2020 წლის ოქტომბერში სწორედ ამ სისტემით ჩატარდება.