მთავარი არხის Facebook გვერდსა და ვებგვერდზე ყოველ ხუთშაბათს ახალ პროექტს, ტოლობას შეგიძლიათ ადევნოთ თვალი. ტოლობა 3-წუთიან ვიდეოებს გააერთიანებს, რომელშიც ცნობილი ადამიანები საზოგადოებისთვის მნიშვნელოვან საკითხებზე, ტერმინებსა და ღირებულებებზე ისაუბრებენ.

ამ თემაზე იურისტმა თამთა მურადაშვილმა, მთავარი არხის მარკეტინგის ხელმძღვანელმა, თეონა ჩემიამ და პროექტის თანაავტორმა სოფო ლილუაშვილმა გადაცემა შენს დილაში ისაუბრეს.

"პროექტის მიზანია, ის ძირითადი უფლებები, რაც ყველა ადამიანს აქვს კონსტიტუციით და აღიარებულია საერთაშორისო საზოგადოების მიერ, ადამიანურ ენაზე ავხსნათ. ყველა ადამიანი თანასწორია და ტოლია — ეს ყველამ უნდა გააცნობიეროს. ნებისმიერ სფეროში არის პრობლემა, რომელიც გამოსასწორებელია. გვინდა, რომ ამაზე ვილაპარაკოთ და მაყურებელიც დავაფიქროთ", — განაცხადა თამთა მურადაშვილმა.

"მედიისთვის ყველაზე მნიშვნელოვანია საზოგადოებრივი საჭიროების დაკმაყოფილება. ჩვენ გვინდა, რომ ადამიანებმა სწორად და მარტივად გაიგონ, რა არის თანასწორობა, რამხელა მნიშვნელობა აქვს ამას ეკონომიკისთვის, საზოგადოებისთვის და ქვეყნისთვის. ვაპირებთ, ჩვენი ყველა პლატფორმა გამოვიყენოთ, რომ სწორი ხმა, სწორი გზავნილები მივაწოდოთ საზოგადოებას", — თქვა თეონა ჩემიამ.

ვიდეოები ყოველ პარასკევს მთავარი არხის დილის გადაცემაშიც გავა.

ცოტა ხნის წინ მთავარი არხი გაეროს ქალთა ორგანიზაციის პრინციპების ხელმომწერი გახდა, რაც ქალთა გაძლიერებასა და გენდერული თანასწორობის ხელშეწყობას გულისხმობს.